Үздік квартет
Ауданмен аттас «Сырдария» квартетінің өнер әлеміндегі орны бөлек. Бүгінде оларды ел жұртшылығы таниды. Өнерлі жігіттер тек өңір көлемінде ғана емес, республикалық концерттерде өнер көрсетіп, шығармашылық шыңдалу үстінде. Квартет құрамы жақында ғана телевизиялық жобаға арнайы шақыртумен қатысып, «Үздік квартет» атанды.Осыдан 9 жыл бұрын квартет ретінде өнерге қадам басқан жігіттер соңғы жылдары республикалық ауқымды іс-шараларда өнер көрсетіп жүр. Тыңдарманның құлақ құрышын қандыратын әндерді әуелетіп, көпшілік ықыласына бөленіп келеді. Жақында ғана «Zhuldyz TV» және «MuzLife» телеарналарының «Жыл таңдауы» концертіне қатысып, өнер ұжымының мерейі үстем болды. Айта кететіні, осы жылдың наурыз айында «Сырдария» квартеті аталған фестивальға алғаш рет қатысқан болатын. Ол кезде аудан өнерпаздары сазгер Аман Сандыбайдың «Уа, дариға» әнінің тұсауын кесіп, «Үздік квартет» номинациясын иеленген еді. Бұл жолы да телевизиялық жобаға арнайы шақыртумен барып, Қазақстанның өнер жұлдыздары қатысқан концертте ән шырқады.
– Біз бұл жолы қармақшылық ақын, сазгер Көптілеу Қосбармақовтың «Нұрсал қыз» әнін алғаш рет сахнада орындадық. Алматыдағы студенттер сарайында өткен өнер кешіне көптеген жұлдыздар, еліміздің түкпір-түкпірінен өнерлі ұжымдар қатысты. Солардың қатарында жаңа туындыны көрерменге тарту еттік. «Zhuldyz TV» және «MuzLife» тележобасына екінші рет қатысып та «Үздік квартет» номинациясымен марапатталдық. Бұл – біздің өнер әлеміндегі жарқын жетістіктеріміздің бірі, – дейді квартет мүшесі Әзиз Садықов.
Алатау бөктеріне сапарлаған өнерлі топ «Бір болайық» бағдарламасына арнайы қонақ болып, «Сен кеткен соң» әнін шырқады. Ал бұған дейін, яғни 2018 жылы олар «Қазақстан» ұлттық арнасында «Таңшолпан» бағдарламасында және «Алматы ТВ» телеарнасының «Таңғы студия» бағдарламасында арнайы сұхбат беріп, өнер көрсеткен.
Өнер ұжымының қалыптасуына мәдениет саласының ардагері Баян Сүюбаева, аудандық мәдениет үйінің директоры Нұрхан Көшербаевтың еңбегі зор. Сондықтан квартет құрамы қолдау көрсеткен жандарға әркез алғысын айтып жүреді. Қазіргі таңда Н.Көшербаев оларға продюсерлік көмек көрсетіп келеді.
– «Сырдария» квартеті алғаш сахнаға халықаралық әйелдер күні мерекесінде өнер көрсеткен еді. Оның құрамында талантты әншілер Дархан Разақов, Әзиз Садықов, Дастан Палмахов, Нұрбол Тұранов өнер көрсетеді. Бүгінде олар шығармашылық жолда шыңдалып, топтың 15-тен аса авторлық әні бар. Сонымен бірге өңірдегі іс-шараларда халық әндерін, патриоттық шығармаларды орындайды. Ерекше дауыстағы жігіттерді бүгінде ел жұртшылығы танып үлгірді. Өнер әлемінде өзіндік орнын қалыптастырды десем артық айтқандық емес. Алдағы уақытта да шығармашылық шыңдалуына қолдау көрсетеміз, – дейді аудандық мәдениет үйінің директоры Н.Көшербаев.
Айта кететіні, өзіндік орнын қалыптастырған ұжымға аудан әкімдігі тарапынан зор қолдау бар. Сондай-ақ кәсіпкерлер Мақсұт Әбілдаев пен Жеңісбек Сыздықов та оларға демеу көрсетіп келеді.
Жалпы, квартет ұжымы алдағы уақытқа ауқымды жұмыстарды жоспарлаған. Оның ішінде, келер жылы топтың құрылғанына 10 жыл толады. Соған байланысты шығармашылық кеш өткізуді осы кезден жоспарлаған. Осының аясында үлкен сахналарда өнер көрсетіп, репертуарларын авторлық әндермен толықтыруда.
Аудандағы мерекелік іс-шаралар «Сырдария» квартетінің қатысуынсыз өтпейді десек, өнерлі ұжымның шығармашылығына табыс тілейміз.
Ердос СӘРСЕНБЕКҰЛЫ
