Тіршілік тынысы Tirshilik-tynysy.kz ақпараттық агенттігі
» » » Ұлық мереке ұлықталды

Ұлық мереке ұлықталды

Жақында «Достық» үйінде аудан­дық ішкі саясат бөлімінің қолдауымен, «Сыр­дария» қоғамдық қорының ұйым­дастыруымен «Тәуелсіздік – мем­ле­кет­тігіміздің алтын діңгегі, дербес­тігіміздің берік негізі» тақыры­бында өзге ұлт өкіл­дерімен кездесу өтті.

Кездесуге Те­рең­өзек кенті ардагерлер кеңесінің төрағасы Зайдағали Жүсіпбайұлы, «Сырдария ауданының әйелдері» қоғамдық бірлестігінің төрайымы Ұлмекен Жанәлиева, халықаралық «Қазақ тілі қоғамы» ҚБ Сыр­дария аудандық филиалының төрағасы Шаһарбек Нұрсейітов, аудандық ішкі сая­сат бөлімінің маманы Ажар Оразымбетова, «Сырдария» қоғамдық қорының төрайымы Несібелі Керейтбаева, аудан тұрғындары қатысты.

Кездесу барысында өзге ұлт өкілдері Тәуелсіздік мерекесі жайында өз ойларын ортаға салып, егемендік жылдары қолға алынған жұмыстарды саралады. Сонымен бірге туған жер топырағында тату-тәтті өмір сүрген ата-бабалары жайын­да сөз қозғады. Егемендіктің қадірін тереңнен ұғынған олар дархан көңіл, қонақжайлылық танытқан қазақ халқына алғысын білдірді. Кездесу барысында Зоя Князева, Гульюзум Кокшарова, Светлана Князева, Люба Махмурзаева, Рианя Кан, Татьяна Потапова, Лиана Ан, Саёра Толаева, Ольга Потолова, Сергей Кокшаров өз өнерлерін көрсетті. Қолөнер бұйымдарын таныстырып, жиналған жұртшылықтың жоғары бағасына ие болды.

– Біз ауданда тұратын өзге ұлт өкілдерімен тығыз бай­ла­ныс орнатып, жиі бас қосып келеміз. Бұл жолы алғашқылар­дың бірі бо­лып, Тәуелсіздік мерекесіне байланысты тағы­лымды іс-шара өткізіп отырмыз. Ұлық мерекенің қазақ халқы үшін маңызы өте жоғары. Елдігімізді айшықтайтын мерекенің мәртебесін көтеру мақсатында жүйелі жұмыстар жүргізетін боламыз, – деді «Сырдария» қоғамдық қорының төрайымы Несібелі Керейтбаева.

Бұл ретте, кездесу кешінің қонақтары ән шырқап, пат­риоттық өлең оқыды. «Сырдария» қоғамдық қоры­ тарапынан арнайы көрме ұйым­дастыр­ған жандарға естелік сыйлық ұсынды.

Балтабай ОРДАБЕКОВ
12 қараша 2022 ж. 312 0