ТӨСБЕЛГІ ҚҰНЫНЫҢ ҚҰДІРЕТІ

Құрылыс - адамзат баласы жер бетінде пайда болған ежелгі дәуірден келе жатқан жасампаз кәсіп түрі. Қазақстан Тәуелсіздік алған тұстан бастап құрылыс саласын дамытуда өзіндік жолы айқындалған. Құрылысшылардың ерен еңбегінің арқасын­да ірі инвестициялық жобалар жүзеге асырылып, небір зәулім де сәулетті  ғимараттар бой көтеруде.  Бұл дегеніміз елдің қарыштап дамуына орасан пайда әкеліп, жаңа заман көшін қалыптастырушы мемлекеттің негізін берік ете түседі. Құрылыс саласында табанды еңбек етіп келе жатқан әрбір азамат болашақтың мызғымас іргетасын қалауда.  Олардың жасампаз жұмысы ұрпақ үшін ізгілікті іске айналмақ.

Құрылысшылар күні қарсаңында  сала мамандары мен ардагерлерін аудан әкімінің орынбасары Е.Ахетов қабылдап, мерекемен құттықтады.

– Кейінгі жылдары бүкіл руспублика бойынша, оның ішінде Сыр өңірінде, Сырдария ауданындақұрылыс саласы қарқынды дамып келеді. Сіздерді осы ауқымды саланың серпінді дамуына, аудан халқының тұрмыс деңгейінің артуына айтарлықтай еңбек сіңіріп жүрген өз ісінің хас шеберлері десек, артық айтқандығымыз емес,  – деді Ерлан Дәуітбекұлы. Өз кезегінде Қазақстан Республикасының Құрылыс және тұрғын-үй коммуналдық шаруашылық істері Комитетінің «Қазақстанның құрметті құ­ры­лысшысы» төсбелгі медалімен еңбек ардагері Төлеу Сүлеймен, облыс әкімінің алғыс хатымен Сырдария ауданының оқ­шау сумен жабдықтау жүйелерін пайдаланушы өндірістік бөлімшесінің автокөлік жүргізушісі Сағатбай Сейпулов, аудан әкі­мінің Алғыс хатымен «Нұрай-Ақжол РГ»жауапкершілігі шектеулі серіктестігінің директоры Ерлан Оспанов, инженері Руслан Қалабаев, Aisar-Group» жауапкершілігі шектеулі серіктестігінің директоры Айбол Срайлов, аудандық құрылыс, сәулет және қала құрылысы бөлімінің әдіскері Бақытжан Нұрпейсов, есепші Айжан Бекжанова марапатталды. Талай жыл құрылыс саласында қызмет етіп, ауданның қалыптасуына өзіндік үлесін қосқан сала ардагерлеріне сый-сияпат табысталды. Ардагер Төлеу Сүлеймен сөз алып, өткен ғасырдың бел ортасында аудан өміріне тікелей атсалысып, сәулеті келіскен ғимарат тұрғызуға азаматтардың еңбегі сіңгенін жеткізді.  Әлі күнге халық игілігіне жараған ғима­раттардың сапалы тұрғызылуына септігі тиген әріптестеріне мерекелік лебізін білдірді.

Б.ОРДАБЕКОВ