Имандылық үйі – шапағат нұры
Мұсылман әлемінде мешіт салғанның қандай сауап екені баршаға аян. Жердегі Алланың үйі халықтың имандылығын арттырып, ауызбірліктің, тұрақтылықтың сақталуына себепші. Осы тұста, аудан орталығында 2014 жылы Тәуелсіздік күні қарсаңында жаңа мешіт ашылып, пайдалануға берілді. Айта кету керек, бұл имандылық үйі аудан халқының бір іске ұйыса білуінің нәтижесінде бой көтерді. Бұған бюджеттен қаржы бөлінбесе де, аудан кәсіпкерлері демеу жасады. Аудан халқы да қолдан келген көмектерін жасап, тұрғындарды имандылыққа үндейтін жаңа мешіт ашылды. Мешіттің жанында 40 орынға арналған медресе және 200 орындық асхана бар. Сонымен бірге, ауданға қарасты Н.Ілиясов ауылында айшықты мешіт бой көтерсе, қазіргі таңда Шаған ауылында да имандылық үйі салынуда.
