Қазақстандықтардың жалақысы қашан өсетіні белгілі болды

Бүгін Парламент "2019-2021 жылдарға арналған республикалық бюджет туралы" заңға өзгертулер енгізді. 1 маусымнан бастап мемлекеттік және азаматтық қызметшілердің жекелеген санаттарының жалақысы артады, деп хабарлайды Stan.kz тілшісі. 

Бүгін мәжілісте Қазақстан Республикасының "2019-2021 жылдарға арналған республикалық бюджет туралы" заңына өзгерістер мен толықтырулар енгізу туралы" Заң жобасы қаралды. Аталған заңға өзгеріс енгізуді сенат депутаттары ұсынған болатын. 

Қаржы және бюджет комитетінің мүшесі Серік Құсайынов аталған заңға сәйкес қазақстандықтардың жалақысы өсетінін айтты. Сондай-ақ, елдегі шығын көлемін 38 миллиард теңгеге арттыру ұсынылды. 

"Сенат енгізген өзгертулер президенттің мемлекеттік және азаматтық қызметшілердің жекелеген санаттарының жалақысын өсіруді 1 шілдеден 1 маусымға жылжыту тапсырмасын орындауға бағытталған", - деді Серік Құсайынов. 

Бұдан өзге Серік Құсайынов мәжілістің қаржы және бюджет комитеті сенат ұсынған өзгерістерді енгізуге келісіп отырғанын жеткізді.