Сырдария аудандық сотында жергілікті сала мамандары мен БАҚ өкілдерінің қатысуымен брифинг өткізілді. Брифингте аудандық соттың судьясы Ж.Жолдасов Қазақстан Республикасы ҚК-нің 345 бабының 4 бөлігімен сотталушы Т-ның қылмыстық ісі бойынша ақпарат берді.

Істің мән-жайына сәйкес сотталушы Т. «Батыс Еуропа – Батыс Қытай» тас жолында өзінің басқаруындағы автокөлігімен шығыстан батыс бағытта басқара отырып, жол жүру қағидаларының талаптарын бұзып, жәбірленуші Е-нің басқаруындағы автокөлігімен соқтығысқан. Нәтижесінде екі адамның өліміне әкеп соғатын іс-әрекет жасаған. Өз кезегінде судья Ж.Жолдасов сот процесі барысында қаралған мәселені жан-жақты айтты. Сот үкімімен сотталушы Т. Қазақстан Рес­публикасы ҚК-нің 345-бабының 4-бөлігімен кінәлі деп танылып, оған осы баппен көлік құралдарын жүргізу құқығынан 3 жыл мерзімге айыра оты­рып, 5 жыл мерзімге бас бостандығынан айыру жазасы тағайындалған. ҚК-нің 63-бабын қолданып, тағайындалған жаза сол мерзімге шартты деп есептеліп, пробациялық бақылауға алынды.