Тіршілік тынысы Tirshilik-tynysy.kz ақпараттық агенттігі
» » ЖЕРЛЕСІМІЗ ЖЫР ДОДАСЫНДА ТОП ЖАРДЫ

ЖЕРЛЕСІМІЗ ЖЫР ДОДАСЫНДА ТОП ЖАРДЫ


Қостанай облысында "Тобылым – Торғайым, жүректен толғайын!" атты республикалық ақындар айтысы өтті. Екі күнге жалғасқан жыр додасы Шақшақ Жәнібектің – 325, Ақсұлу Орысбайқызының – 145 және Қайнекей Жармағанбетовтың 100 жылдығына арналды. Осыған дейін республикалық ақындар айтысы бұл өңірде 2008 жылы ұйымдастырылған болатын.
Көрермендердің де сахна төрінен орын алған әр жұпқа деген қошеметінен олардың айтыс өнерін сағынып қалғанын айқын аңғарасың. Сөз сайысында айтыскер ақындар елдік, бірлік тақырыбын жырға арқау етті. Сахнада сынға түскен 14 ақынның барлығы да көпшіліктің қошеметіне бөленді. Жыр сүйер қауымды ынтықтырып жеткен айтыстың бас жүлдесін жерлесіміз, «Алтын домбыраның» екі мәрте жеңімпазы Мұxтар Ниязов жеңіп алды. Көрерменді жырмен сусындатқан Мұхтар Ниязовқа Қостанай облысы әкімінің орынбасары Марат Жүндібаев аталған өңірдегі «СарыарқаАвтоПром» машина жасау зауытында құрастырылған «Пежо» автокөлігін сыйға тартты. Жүлделі орындардан көрінген басқа да ақындарға арнайы диплом мен қаржылай сыйлық табыс етілді.
12 қазан 2018 ж. 906 0