Елбасының «Болашаққа бағдар: Рухани жаңғыру» мақаласында жастардың үлгі алуына, заманауи Қазақстанның келбетін танытуға мүмкіндік беретін «100 жаңа есім» жобасы ұсынылған. Бұл жоба жайында Мемлекет басшысы «Жастар өмірге шынайы көзбен қарап, өз тағдырларына өздері иелік ете алатын азаматтар болуы үшін оларға үлгі ұсынуымыз керек» деп ескерткен болатын. «Жаңа есім» жобасы өзінің батыры мен ақынын көрсеткісі келетін қалың жұртшылық тарапынан кең қолдау тауып, республикалық маңыздағы үздік тұлғалармен қатар, әрбір облыстың, әрбір ауданның, тіпті әрбір мектептің, ұжымның үздік жүз тұлғасын тізімдеп шығу бастамасы жиі көтерілуде.

Аталған жобаның биыл екінші кезеңі басталып, еліміздің түкпір-түкпірінен үміткерлер ұсынылуда. Солардың бірі Қызылорда облысынан ұсынылып жатқан кәсіпкер Айдос Сайлығараев.

Еңбек жолын 18 жасында даяршы болып бастаған Айдос бүгінде «Браунис Казахстан» ЖШС-ның директоры болып отыр.

Айдос Мирамбекұлы өзін іскер, ұйымдастыру қабілеті жоғары, күрделі мәселелерді заманауи тәсілдермен шеше білетін білікті басшы ретінде көрсетіп келеді. Өзінің алғырлығымен түрлі қиындықтардың шешімін тауып, бизнес саласында жоғары нәтижелерге жетіп, алға өрлеуде. Кәсіпкерлер палатасының түрлі іс-шараларына белсенді түрде қатысып, нормативті-құқықтық актілерді талқылауда өз ұсыныстарын жеткізіп, жаңа ұтымды ойларымен жастарға жол сілтеп жүр.

Қазірде «Браунис Қазақстан» ЖШС құрылтайшысы және президенті қызметін атқаруда. 2009 жылы алғашқы «Дастарқан» асханалар желісін құрып, 2010 жылы – «Cofee do» кофеханасын ашты. 2011 жылы кондитерлік цех пен дүкендер желісі секілді жаңа өндірістерін ашты. Аталған цехтың ашылу барысында «Бизнестің жол картасы-2020» бадарламасы аясында арнайы Германиядан СЕС-сарапшыларын шақыртып, торттар мен десерттердің жаңа өндіру технологиясын ендірді.

Кәсіпкер 2015 жылы 10-шы бизнес объектісін ашып, жалпы «Браунис» жобасы аясында 200 тұрғынды жұмыс орнымен қамтамасыз етіп отыр. 2012-2013 жылдары өнім шығару саласында үздік кәсіпкер ретінде танылып, «Жылдың үздік тауары» байқауында Қызылорда қаласы бойынша бірінші орынды жеңіп алды.

Ізденімпаз кәсіпкер әлі де Астана мен Алматы қалаларында жаңа кофеханалар ашып, тіпті Дубайда өз ісін жалғастырмақ.