Орасан жетістік жігерлендіреді
Жаңақорған аудандық мәдениет үйінің ұйымдастыруымен еңбек ардагері Машбек Нәлібаевтың 100 жылдығына арналған «Маңдай термен келген мәртебе» атты мәдени-демалыс кешендерінің облыстық байқауы жоғары деңгейде өтті. Облысқа қарасты Қызылорда қаласы мен барлық ауданнан келген өнер ұжымының басын қосқан тағылымды іс-шарада Сырдария аудандық мәдениет үйі жанындағы «Зерде» мәдени-демалыс кешені сәтті өнер көрсетті. Жергілікті өнерпаздар жүлделі ІІІ орынды иеленді.Байқау үш кезеңнен тұрды. Алғашқы кезеңде қатысушылар Машбек Нәлібаевтың өмірі мен еңбек жолын қамтыған бейнеролик ұсынды. Жасанды интеллект технологиясының көмегімен дайындалған бейнероликте еңбек ардагерінің ел дамуына қосқан үлесі, туған жердің өркендеуіне сіңірген еңбегі әсерлі түрде көрсетілді. Келесі екі кезеңде «Зерде» мәдени-демалыс кешенінің өнерпаздары шығармашылық шеберліктерін паш етті. Ән мен сахналық қойылым арқылы көрермен ықыласына бөленіп, аудан мәдениетінің әлеуетін лайықты деңгейде таныстырды.
Жалпы алғанда, байқаудың басты мақсаты – еңбек ардагері Машбек Сапарбайұлының өнегелі ғұмырын, Отанға адал қызметін және ұрпаққа қалдырған рухани мұрасын кеңінен насихаттау. Мәдени-демалыс кешендерінің шығармашылық әлеуетін арттырып, тәжірибе алмасуға, ұлттық мәдениет пен өнерді дамытуға және өңірлер арасындағы мәдени байланысты нығайтуға бағытталды.
«Зерде» мәдени-демалыс кешені аудан аумағындағы шаруашылықтарда, Талсуат ауылындағы сауықтыру орталығында концерттік бағдарлама ұйымдастырып, мәдениет үйлері жоқ шалғай елді мекендердің тұрғындарына тұрақты түрде мәдени қызмет көрсетіп келеді. Бұл жұмыс ауыл тұрғындарының рухани өмірін жандандырып, мәдени игіліктің баршаға қолжетімді болуына ықпал етуде.
Аудандық мәдениет үйінің директоры Жасұлан Жәрменов ұжымның жетістігі жүйелі еңбектің нәтижесі екенін атап өтті.
– «Зерде» мәдени-демалыс кешенінің негізгі бағыты – мәдениет үйлері жоқ немесе шалғай орналасқан елді мекендердің тұрғындарына сапалы мәдени қызмет көрсету. Ұжым мүшелері ауданымыздың түкпір-түкпірін аралап, сан түрлі концерттік бағдарлама ұсынып келеді. Облыстық байқаудағы жүлделі ІІІ орын – осы жүйелі еңбектің жемісі. Бұл жетістік – ұжымның шығармашылық ізденісі мен ұйымшылдығының нәтижесі. Алдағы уақытта да мәдени қызметтің аясын кеңейтіп, тұрғындарға рухани демалыс сыйлау бағытындағы жұмыстарымызды жалғастырамыз. Құрылғанына 30 жылға жуық уақыт болған ұжымның құрамынан талай талантты жандар шыққан, – деді Жасұлан Жәрменов.
Айта кетейік, «Зерде» мәдени-демалыс кешенінің жетекшісі – Ақбота Талғатова. Ұжым құрамында Ерхан Қалуадинов, Мұхтар Наватов, Думан Күшекбаев және Ержан Мұхитдинов бар. Заманауи құрал-жабдықпен жабдықталған мәдени-демалыс кешені ауданның ауыл-аймағын тұрақты аралап, тұрғындарға сапалы мәдени қызмет көрсетіп келеді.
Қорасан ата топырағында дүниеге келген Машбек Сапарбайұлы жастайынан тағдыр тауқыметін көріп, Ұлы Отан соғысы жылдарында ел қажетін өтеуге атсалысты. Кейін күріш шаруашылығын дамытуға зор үлес қосып, адал еңбегімен ел құрметіне бөленген абзал азамат ретінде бейнеленді. Заманауи форматта дайындалған жұмыс қазылар алқасының жоғары бағасына ие болды.
Бұл жүлделі орын ұжымның алдағы жұмыстарына жаңа серпін беріп, Сырдария ауданы мәдениетінің мерейін тағы бір мәрте асқақтатты.
Балтабай АЯБЕКҰЛЫ
