Ақпарат айдынындағы абыройлы міндет

Салтанатты жиынды ашқан аудан әкімі Берік Сәрменбаев БАҚ саласының арда­герлері мен мамандарын кәсіби мерекемен құттықтап, сый-құрмет көрсетті.

– Бұдан бір ғасырға жуық уақыт бұрын ұлт ұстазы Ахмет Байтұрсынұлы «Газет – халықтың көзі, құлағы һәм тілі» деп баға берген еді. Бұл ұлағатты сөз­ді қазір тек басылымдарға ғана емес, барлық бұқаралық ақпарат құрал­дары­на қатысты қолдануға болады. Мем­лекет басшысы Қасым-Жомарт Кемелұлы Тоқаев «Қазір еліміздегі бар­лық бұқаралық ақпарат құралдары Қазақстанның мемлекеттілігін нығайту, елі­міз­де жүргізіліп жатқан реформаларды халыққа жеткізу жолында күш біріктіруде» деп атап көрсетті. Кә­сіби бі­ліктілік, батылдық, жауапкершілік пен жанашырлық танытатын журналис­тер қауымы әркез халықтың үлкен құрметіне ие. Журналистер қауымының дайындаған әрбір материалында елдің мұңы мен мұқтажы, ойы мен пікірі, талабы мен тілегі, қоғам дамуының тынысы айқын көрініс тауып отырады. Жұмыс барысында жұртпен етене араласып, «Халық үніне құлақ асатын мемлекет» қағидатын жүзеге асыруда Сіздер үл­кен еңбек атқарудасыздар. Аудан айнасы саналатын 87 жылдық тарихы бар «Тіршілік тынысы» газеті ұжымы ау­данның әлеуметтік-экономикалық жағ­дайын, оң өзгерістері мен жағымды жа­ңалықтарын үнемі ақпараттық қолдап келеді. Осы жылдар ішінде қарымды қаламгерлер мен мықты журналистер ау­дан айнасының қалыптасуына еңбек сіңірді. Ізхан Досмағамбетов, Абызбай Маханбетов, Тынышбек Дайрабай, Асқар Кіребаев, Балашбек Шағыров, Мұхтар Сақтапов, Шолпан Оразова, Сәуле Сұлтанқызы, Дәметкүл Құмақбай, Мейрамбек Шілдебаев, Шаһарбек Нұрсейітов, Мүсілім Қалмұратұлы және басқа да қаламгерлердің есімі елге белгілі. Бүгінде ауданнан шыққан журналистер шет мемлекеттерде, республикада жемісті еңбек етуде. Атап айтқанда, Нұрсұлу Қасымова Бельгияда меншікті тілші болса, Гүлмира Дайрабай, Нағи Бақытбеков, Ғабит Ұзақбай, Айсұлу Қасымова, Нұрлан Жақыпбек, Нұрбек Дәуренбек, Дәулет Қырдан, Нұржан Мүзарапшин елімізде ақ­парат саласында қызмет етуде. Аға буын­ның ізін жас қаламгерлер ла­йықты жал­ғастырып келеді. Биыл Қа­зақстан Жа­зушылар және Журналистер ода­ғының мүшесі, аудандық мәслихат депутаты, ақын Ақтөре Ибрагимұлы Мемле­кет басшысының Жарлығымен «Ерен еңбегі үшін» медалімен марапатталды. Бұл – ауданның қаламгерлеріне деген құр­меттің белгісі.

Бүгінгі күні аудандық басылым 3 мың­нан аса тиражбен жарық көріп, халыққа ақпарат ұсынуда. 30-ға жуық қызметкер аянбай еңбек етуде. Оларға сала арда­герлері мен баспасөз саласының жанашырлары әркез қолдау білдіруде. Сондықтан меншікті басылымның еңбе­гін аудан халқы ерекше ықыласпен баға­лайды. Осы сәтті пайдалана отырып, Сіздерге шынайы алғысымды жеткізгім келеді, – деді аудан әкімі.

Салтанатты іс-шарада жылдар бойы қаламы қолынан түспеген кәсіби мереке иелері марапат төрінен көрінді. Оларға облыс, аудан әкімінің «Алғыс хаты» табыс­­талды. Өз кезегінде ауданның дамуына еңбек сіңіріп жүрген саланың ардагерлері Жұмакүл Қожағұлова мен Қазына Асықбаева биыл мерейлі 70 жасқа толып отыр. Аудан басшысы қос ардагерге зор ілтипат танытып, сый-құрмет жасады.

Бұдан бөлек, «Сыр медиа» ЖШС-нің бас директоры Марат Аралбаевтың арнайы «Алғыс хаты» баспасөзге жазылуға үлес қосып жүрген бірқатар азаматқа табысталды.

Салтанатты іс-шарада аудан про­куроры­ның орынбасары Махмут Алмас көпшілікке жылы лебізін білдіріп, ау­дандық «Тіршілік тынысы» газетінің бірқатар маманын аудан прокуроры Абай Әлімбаевтың «Алғыс хатымен» марапаттады.

Айта кетейік, мерекелік басқосуда аудандық мәслихат төрағасы Ержан Әжікенов, аудандық ардагерлер кеңе­сінің төрағасы Мұса Келдібаев, ақ­парат саласының майталмандары Мүсілім Қалмұратұлы, Мейрамбек Шілдебаев сөз алып, сала мамандарының ай­рық­ша еңбегін атап өтті. Аудандық орта­лық кітапхана ұжымы мерекелік көрме ұйымдастырып, көпшілікке таныс­тыр­ды. Осы орайда, қарымды қаламгер, Қазақстанның Құрметті журналисі Мұхтар Сақтаповтың туғанына 90 жыл толуына орай арнайы көрме жасалды. Аудан өнерпаздары өнер көрсетіп, шат-шадыман көңіл-күй сыйлады.