Қауіпсіз жол – ел тыныштығы

Құқық қорғау саласында түрлі оқиғалар орын алатыны анық. Бейбіт күнде ел тыныштығын күзетіп, келеңсіз әрі апатты жағдайдың алдын алатын полиция сақшыларының күн-түн демей қызмет етуі нағыз ерлік. Осы тұста аудандық полиция бөлімінің қадағалауымен жыл бойы көптеген жедел-профилактикалық іс-шаралар өтуде. Әр іс-шара өзіндік жеке бағыты бойынша жүзеге асуда.

Республикалық және об­лыс­тық көлемде өтетін жедел-профи­лак­­тикалық іс-шаралар жол-көлік оқи­ғаларының алдын алу мақсатында жоспарға сәйкес өтіледі. Соның ішінде жыл басынан бері «Қауіпсіз жол», «Мотоцикл», «Скутер», «Автобус», «Тасымалдаушы», «Құқықтық тәртіп», «Балабақша», «Учаске», «Мигрант», «Киік» және «Борышкер» жедел-профилактикалық іс-шара­лары өткізіліп, тұрғындар мен жүргізушілерге түсіндірме жұмыс­тары жүргізілген. Бұл туралы Сырдария ауданы полиция бөлімі әкімшілік полиция бөлімшесінің бастығы, полиция подполковнигі Сейлхан Кеукенов айтып өтті.

– 2025 жылдың 11 айының қоры­тындысы бойынша аудан аумағында 34 жол-көлік оқиғасы тіркеліп, жол апатынан 15 адам қаза тауып, 60 адам әртүрлі дене жарақатын алған. Оқыс оқиғалар сотқа жолданып, 11 жүргізуші көлік жүргізу куәлігінен айырылды. Ал, мас күйінде көлік айдаған 23 құқық бұзушылық тір­келіп, жүргізуші куәліктері тәркіленді. Барлық құқық бұзушылық әркеттер саны 2272-ге жетсе, айыппұл көлемі былтырғы жылмен салыстырғанда 1,5 есе артқан. Жол қозғалысы бойынша құқық бұзғандар саны 4611 болса, оның ішінде айыппұл салынған құқық бұзу­шылық 1496-ны құрады. Алдыңғы жылмен салыстырғанда құқық бұзушылық бірнеше есе артып тұр. Республикалық, облыстық жедел-профилактикалық іс-шаралардың кешенді жұмыс істегенінің нәти­же­сінде біршама түсіндірме жұ­мыс­тары жүргізілді. Қазіргі таңда 1-7 желтоқсан аралығында жүзеге асып жатқан «Қауіпті жүргізуші» же­дел-профилактикалық іс-шарасы өтуде. Бастысы, жол қозғалысына қатысушыларды жол ережелерін қатаң сақтауға және жолда өзара сыйластық танытуға, қайғылы жағ­дайға әкеп соғуы мүмкін әрекетке жол бермеуге шақырамыз, – деді полиция подполковнигі.

Биылғы жыл «профилактика жылы» болғандықтан бұл көр­сет­кіш өтіп жатқан жедел-профи­лак­тикалық іс-шара­­лардың нә­ти­жесі болып табылады. Сонымен қатар аудан аумағында 77 бейнебақылау қондырғысы орна­тылған. Кіші жедел басқару орта­лығы арқылы да анықталған құқық бұзу­шы­лық әрекеттері артқан. Сыр­дария ауданы бойынша полиция бөлімін­де 83 қызметкер жұмыс істеп, жол қозғалысы мен жол-көлік оқиға­ларының алдын алуда.

Жаздың аптап ыстығында, қыстың бұрқасын аязында елге қызмет етіп, аудан аумағының тыныштығын күзе­тіп, қайғылы оқиғаны болдырмау мақ­сатында еңбек етіп жүрген тәртіп сақшылары әркез құрметке лайық. Жұмыс барысында түрлі келеңсіз жағдайға тап болса, оның алдын алу және күресу шешімін дер кезінде қабылдау керек. Туған жеріне қыз­мет ете отырып, отбасын асырау, қауіпті оқиғаларда өмірін қатерге тігу – нағыз ерлік.

Гүлсезім ЖАНСЕРІКҚЫЗЫ

Фото: Ашық дереккөзден