Кездесулерде аудан басшысы облыс және ауданда атқарылған жұмыстарға тоқталды.

– Мемлекет басшысы Қасым-Жомарт Кемелұлы Тоқаевтың қолдауымен, ай­мақ басшысы Нұрлыбек Машбекұлы Нәлібаевтың тапсырмасымен соңғы үш жыл­да облыста денсаулық сақтау саласына 441 млрд теңге қаржы бөлініп, түйткілді мәселелердің түйіні шешілуде. «Ауылда денсаулық сақтауды жаңғырту» ұлттық жобасы аясында барлық ауданда 28 медициналық нысан жаңадан салынды. Төрт көпбейінді аудандық орталық аурухана жанынан қосымша құрылыстар, емханасы мен онкологиялық бөлімшесі бар 300 орындық көпбейінді аурухана бой көтеруде. Соңғы үш жылда 24 медициналық нысан күрделі жөндеуден өтті. Барлық елді мекендегі емдеу меке­мелері санитарлық автокөлікпен 100 пайыз қамтылды. Қызылордада алғаш рет бауыр ауыстыру отасы жасалды. 10 мың донацияға арналған қан орта­лығы пайдалануға берілді. Медицина сала­­сының мамандарына арнап 100 пәтерлік тұрғын үй салу туралы шешім қабыл­данды. Құрылысы басталды, жыл соңына дейін аяқталмақ. Облыс орта­лы­ғында 48 млрд 500 млн теңгеге 200 орындық перинаталдық орталық ғимараты, сол жағалаудан 14 млрд 500 млн теңгеге 500 орындық емхана, қала­ның шет аймағында 10 млрд теңгеге 400 орындық емхананың құрылысы жақын күндері басталады. Спорт саласында да жағымды жаңалық жетерлік. Облыста УЕФА классификациясы бойынша 4-санатты 11 мың орындық «Қайсар arena» стадионы салынды. «Самұрық қазына» қорымен бірлесіп құны 3 млрд 400 млн теңгеге «Үстел теннисі» орталығы пайдалануға берілді. «Қызылорда Арена», «Қазақстан халқына» қорының қолдауымен 2 млрд 900 млн теңгеге көп­салалы дене шынықтыру-сауықтыру кешен­дері осы айда келушілеріне есік ашады. Соңғы үш жылда облыста 20 спорт кешені салынып, тұрғындар игі­лігіне берілді. Биыл аймағымызда «Ауыл – ел бесігі» бағдарламасы аясында тағы 6 спорт кешені ашылады, – деді Берік Әбдіғаппарұлы.

Ауданға қарасты Нағи Ілиясов ауылы биыл 662 млн теңгеге табиғи газға қосылды. Облыс әкімінің бастамасымен өткізілген «Үздік елді мекендер» байқауында іргелі ауыл бірінші орынды жеңіп алды. Ал аудандағы үлкен ауыл – Шаған ауылында 8 көше күрделі жөндеуден өткізілді. 2024 жылы ауыл­ды электр желілерімен жабдықтау жұ­мыс­тары толық аяқталса, бүгінде 328 млн теңгеге елді мекеніндегі дәрі­гер­лік амбулаторияға күрделі жөндеу жұмыс­тары жүргізілуде. Жақында елді мекен табиғи газға қосылды. Іңкәрдария ауы­лында орта мектеп, шағын орталық, фельд­шерлік-акушерлік бекет, ауылдық клуб үйі, кітапхана және «Қазпошта», ветеринарлық станса бөлімшесі халыққа қызмет көрсетеді. Ақжарма ауылының жолдары жөнделіп, көше бойына қаз-қатар жарықшам орнатылған. Әлеу­меттік нысан санатына кіретін мектеп, мәдениет үйі, дәрігерлік амбулатория секілді бір­неше мекеме халық игілігі үшін жұмыс жасауда.

Өз кезегінде тұрғындар инфра­құры­лымдық жұмыстар, қоғамдық тәртіп, әлеу­меттік сала, денсаулық сақтау саласына қатысты ұсыныс-пікірлерін ортаға салды. Сондай-ақ ел игілігі үшін атқарылып жатқан жұмыстарға ризашылықтарын біл­дірді. Аудан басшысы ұсыныс-пікірлер негізінде жұмыс жүргізілетінін, мәселелер тұрақты бақылауда болатынын атап өтті.