Қазақстан жетістіктері: министр халықты Спорт күнімен құттықтады
Қазақстанда Спорт күніне орай құттықтау сөзін Туризм және спорт министрі Ербол Мырзабосынов жолдады, деп хабарлайды Egemen.kz.Министр бұл мерекенің мақсаты – салауатты өмір салтын насихаттау, бұқаралық спортты дамыту және халық денсаулығын нығайту екенін атап өтті.
«Спорт – бұл тек физикалық белсенділік емес, ол – ерік-жігердің, мақсатқа ұмтылыстың, достық пен бірліктің көрінісі. Мемлекет басшысы Қасым-Жомарт Тоқаевтың қолдауымен еліміздегі спорттық мүмкіндіктер жыл сайын кеңейіп келеді», – деді министр.
Ербол Мырзабосыновтың айтуынша, соңғы жылдары елімізде бірқатар маңызды қадамдар жасалды:
- Жаңа спорт нысандары өңірлерде ашылып жатыр;
- Қазақстандық спортшылар халықаралық ареналарда табысты өнер көрсетуде;
- 2025 жылдан бастап спорт саласындағы заңнамаға елеулі өзгерістер енгізілді;
- Параспорт пен бұқаралық спортты қолдауға ерекше көңіл бөлінді;
- Ұлттық спорт түрлерін дамытуға қаржы бағытталды.
Министр Қазақстанның спорттағы беделі артып келе жатқанын атап өтті.
«Биылдың өзінде елімізге жиырмаға жуық халықаралық спорт ұйымдарының өкілдері келді. Олардың жартысын Мемлекет басшысы жеке қабылдады. Бұл – Қазақстанның спорттағы абыройының өскенін дәлелдейді», – деді ол.
Сонымен қатар 2025 жылы елімізде бірнеше ірі халықаралық турнир ұйымдастырылғанын, қазақстандық спорт нысандарының қазіргі заман талабына сай екенін жеткізді.
Ербол Мырзабосынов барлық қазақстандықтарды мерекемен құттықтап, денсаулық, сергектік және жаңа жеңістер тіледі.
«Бүгінгі жетістіктер – жаттықтырушылардың, спорт ардагерлерінің, жанкүйерлердің және барша спорт сүйер қауымның ортақ еңбегі», – деді министр.
Фото: Ашық дереккөзден
