Сырдария – өркениеттер ізі сақталған құтты мекен
Сырдария ауданы – тамыры терең, тарихы кенен, береке-бірлігі бекем киелі өңір. Қасиетті қарт өзеннің жағасында орналасқан ынтымағы жарасқан ауданның бүгінде әлеуметтік-экономикалық әл-ауқаты қарқынды дамып, аймақтың алдыңғы қатарынан көрінуде.Ауданнан шыққан Социалисттік «Еңбек Ерлері» Дүйсенбай Керейтбаев, Нағи Ілиясов, Ибадулла Ақниязов, Цой Ги Хва, Қасым Бөдеев, Ахмет Халықов, Алдаберген Бисенов, Бақытжан Серімбетов, Амангелді Ахметов, Орынбасар Бәйімбетов, Қуаныш Сарбөпеев секілді азаматтар мен Күләнда Әбдіраманова, Айша Меңлібаева, Балдырған Мұстафаевалар еңбектің ерен үлгісін көрсеткен. Ал тәуелсіздік алғаннан кейін «Еңбек Ері» атағын иеленген Абзал Ералиевтің ауылды гүлдендіріп, дамытуға қосқан еңбегі зор. Осындай ел ағаларымен мақтанатын аудандағы Н.Ілиясов, «Бесарық» секілді ауылдар облыстың ғана емес, елімізде маңдайалды, озық елді мекенге айналды. Газет тілшісі аудан әкімі Берік Сәрменбаевпен ауданның даму барысы, атқарылып жатқан жұмыстар туралы әңгімелескен еді.
– Берік Әбдіғаппарұлы, өзіңіз ауданға басшылыққа келгелі екі жыл болыпты. Оның алдында да аудан әкімінің орынбасары қызметін атқардыңыз. Жалпы бұл жердің тыныс-тіршілігі өзіңізге жақсы таныс деп ойлаймын. Бүгінгі даму деңгейіне, экономикалық әл-ауқатына тоқталсаңыз…
– Ел Президенті Қасым-Жомарт Тоқаевтың тапсырмасымен, аймақ басшысының қолдауымен мемлекеттік бағдарламалар аясында ауданда жоспарланған ауқымды жұмыстар жүзеге асып, әлеуметтік-экономикалық даму бағытында тұрақты өсім қалыптасты. Жыл басынан бері ауданда барлық сала бойынша даму динамикасы сақталды.
Экономикаға тікелей ықпал ететін ауданның өнеркәсіп орындары 42,5 млрд теңгенің өнімін өндіріп, өткен жылдың тиісті кезеңіне қарағанда 7,5 пайызға ұлғайды. Оның ішінде, өңдеу өнеркәсібі 6,9 млрд теңгені құрап, 34,7 пайызға өсті. (Тау-кен – 3,5%, тамақ өнеркәсібі – 26,8%, металл емес минералды өнімдер – 9,6 есеге ұлғайып отыр). Ауыл, орман және балық шаруашылығының жалпы өнімі осы жылдың қаңтар-мамырында 2,5 млрд теңгені құрап, өткен жылдың тиісті кезеңімен салыстырғанда 2,7 пайызға артып отыр. Биыл аудан экономикасына 30,7 млрд теңге негізгі капиталға инвестиция тартылды, бұл өткен жылдың тиісті кезеңімен салыстырғанда 118,5 пайыз. 8139 шаршы метрге тұрғын үй салынып, 5,3 пайызға ұлғайды.
Құрылыс жұмыстарының көлемі биыл 5197 млн теңгені құрап, 107 пайыз болды. Бөлшек сауда айналымының нақты көлемі 1,3 млрд теңге болып былтырғы тиісті кезеңімен салыстырғанда 100,2 пайызды көрсетті. 2025 жылдың 1 маусымына 2698 шағын және орта кәсіпкерлік субъектілері тіркелген. Оның 153-і шағын және орта кәсіпкерліктің заңды тұлғалар, 1275 жеке кәсіпкер, 1270 шаруа және фермер қожалығы.
Жұмыс жасап тұрған кәсіпкерлік субъекті саны 2639 болып, өткен жылдың осы кезеңімен салыстырғанда 96,6 пайызды құрады. Жұмыс жасап тұрған кәсіпкерлік субъектілерінің үлесі 97,8 пайыз. Міне, көрсеткіштердің барлығы ауданның даму динамикасының жоғары екенін байқатады.
– Қазір қандай ақпарат болсын барлығы қолжетімді. Ауданның дамуы, жылт еткен жаңалығы болсын теледидардан көрсетіліп, әлеуметтік желі мен баспасөз беттерінде жарық көріп жатады. Ауданда іргелі істер барын да білеміз. Дегенмен өзіңізден тағы бір естіп білгіміз келеді. Басты-басты жобалар жайында айтып кетсеңіз…
– Ауданда жол, құрылыс коммуналдық сала және абаттандыру бойынша жұмыстар қарқынды жүргізілуде. Мемлекет басшысы халықты қолжетімді баспанамен қамту – басым бағыттардың бірі екенін атап өтті. Осы ретте, өткен жылы «Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасын» іске асыру жөніндегі іс-қимыл жоспары негізінде Тереңөзек кентінде 144 пәтер сатып алынып, кезекте тұрғандарға табысталды. Ауданда елді мекендерді табиғи газбен қамту жұмыстарына ерекше мән берілуде. Алдыңғы жылы «Ауыл – ел бесігі» бағдарламасы аясында 330 млн теңгеге Қалжан ахун ауылы «көгілдір отынға» қосылды. Былтыр құны 1 млрд теңгеге Сәкен Сейфуллин және Асқар Тоқмағанбетов ауылдары газдандырылды.
Биыл Нағи Ілиясов ауылы «көгілдір отынға» қосылды. Сонымен қатар, аудан көлеміндегі іргелі ең үлкен ауыл «Шаған» ауылына газ құбырын тарту жұмыстары жүргізілуде. Аталған елді мекен тұрғындары биыл табиғи газдың игілігін көретін болады. «Ақжарма» ауылына да газ тарту жұмыстары үшін тиісті қаржы бөлініп, қолданыстағы заңдылықтарға сәйкес жұмыс жасалуда. Осы жұмыстардың нәтижесінде аудан халқын газдандыру деңгейі 70 пайызға жетеді.
Электр желілерін қайта жаңғырту жұмыстары тұрақты жүргізіліп келеді. 2023 жылы құны 1,6 млрд теңгеге «Айдарлы», «Жетікөл», Аманкелді, «Қоғалыкөл» елді мекендерінің электр желілері (барлық бағаналар, сым, трансформаторлар) 100 пайыз ауыстырылып, қайта жаңғыртылса, 2024 жылы 1,6 млрд теңгеге «Шаған» ауылында дәл осындай жұмыстар аяқталып, бүгінде Қалжан ахун елді мекенінде тиісті шаруа атқарылуда. Нәтижесінде ауданның электр жүйесінің тозу деңгейі 65 пайызға төмендейді.
Оңтүстік өңірлерде электр энергиясының тапшылығын болдырмау мақсатында Қызылорда облысында құны 800 млрд теңгені құрайтын қуаттылығы 1100 мегаваттық жаңа бу-газ қондырғыларының құрылысы жоспарлануда. Жаңа бу-газ қондырғылары Сырдария ауданының аумағында салынады, оған 270 гектар жер бөлінді. Жоба ауданның экономикасын дамытуға септігін тигізеді.
Өткен жылы «Ауыл – ел бесігі» бағдарламасымен құны 174 млн теңгеге Тереңөзек кентіндегі көпқабатты тұрғын үйлер ауласын абаттандыру жұмыстары жүргізілді. Мемлекеттік бағдарлама аясында құны 73,2 млн теңгеге аудан орталығында 6 көпқабатты тұрғын үй қайта жаңғыртудан өткізілді.
Аудандық бюджет есебінен 200 млн теңгеге орталықтағы «Тағзым алаңы» абаттандырылып, «Жастар аллеясы» салынса, облыс әкімі Нұрлыбек Нәлібаевтың тапсырмасына сәйкес, аудан көлеміндегі халық көп шоғырланған, әлеуметтік нысандар мен мектептер орналасқан көшелерге 250 млн теңге қаралып, 6 көшеде 13 шақырым жаяу жүргіншілер жолы салынды.
Мемлекет басшысының бастамасымен жүзеге асқан «Таза Қазақстан» экологиялық акциясы аясында ауданда «Таза өлке», «Киелі мекен», «Жасыл аймақ», «Өнегелі ұрпақ» және «Мөлдір бұлақ» апталықтары ұйымдастырылып, санитарлық тазарту, көркейту және көгалдандыру жұмыстары тұрақты жүргізілуде. Осыған байланысты Тереңөзек кентінде 475 млн теңгеге тұрмыстық қатты қалдықтарды сұрыптауға арналған полигон пайдалануға берілді. Қазіргі таңда 7 адам жұмыспен қамтылып, тұрмыстық қалдықтар сұрыптаудан өтуде. Аймақ басшысының бастамасымен үшінші рет өткізілген «Үлгілі елді мекен» байқауының нәтижесінде Тереңөзек кенті жүлделі орынға ие болып, тазалық жұмыстарына 2 арнайы техника берілді.
Биыл Тереңөзек кентінің көшелерінде жаяу жүргіншілер жолын салу, көпқабатты тұрғын үйлердің ауласын қайта жаңғырту, 6 көшеге қиыршық тас төсеу, «Ақжарма» ауылына газ тарту, Аманкелді ауылында 2 көшеге қиыршық тас төсеу, «Жетікөл» ауылының 5 көшесіне ағымдағы жөндеу, ойын алаңын салу, «Шаған» ауылының кварталішілік газ тарату желісінің құрылысы, көшелерге жөндеу жұмыстарын жүргізу, «Шіркейлі» ауылында 1, С.Сейфуллин ауылында 3 көшеге күрделі жөндеу, электрмен жабдықтау, А.Тоқмағанбетов ауылын электрмен жабдықтау, жаяу жүргінші жолын салу секілді жұмыстар биылға жоспарланып отыр.
Аймақ басшысының бастамасымен өткен жылы «Руханият жылы» деп жарияланғаны белгілі. Осыған орай ауданымызда мәдениет саласында да біршама жұмыс атқарылды. Аудан орталығында неке қию залы, кітапхана, музей, мұрағат, жастар сарайы, ардагерлер мен аналар үйі бар құны 1,5 млрд теңгені құрайтын «Руханият орталығы» бой көтерді. 2025 жылдың ақпан айында ел игілігіне пайдалануға берілді. Аудан орталығына ерекше сән беріп тұрған ғимаратта, мәдени-көпшілік шаралар, рухани кештер үздіксіз жүргізіліп, кітапхана оқырмандарына 24 сағат жұмыс жасауда.
Айтулы жылда ауданның мәдениет саласына үлкен қолдау көрсетіліп, клубтар мен мәдениет үйлері жанынан түрлі бағыттағы шығармашылық үйірмелерді қамтитын «Адал адам» рухани-мәдени орталықтары жұмысын бастады. Бұл орталықтарда 35 жаңа үйірмелер ашылып, онда жастар мен жасөспірімдер шығармашылықпен айналысуда.
Құны 185,4 млн теңгеге «Бесарық» ауылдық мәдениет үйі күрделі жөндеуден өтті және Аманкелді, «Жетікөл», Н.Ілиясов, «Шаған», «Іңкәрдария», «Ақжарма», Қалжан ахун елді мекендеріне «ЛЭД» экран, музыкалық аппаратуралар мен аспаптар, басқа да құрал-жабдықтар алынды.
Кейінгі екі жылда аудан көлеміндегі А.Тоқмағанбетов, Қалжан ахун, «Іңкәрдария» ауылдарының медициналық ғимараттары, Тереңөзек кентінде аудандық аурухананың оңалту бөлімшесі және Аманкелді елді мекеніндегі дәрігерлік амбулатория күрделі жөндеуден өтті. Сала жұмысын жетілдіру үшін ауданға 14 медициналық автокөлік берілсе, 133,7 млн теңгеге УЗИ, жылжымалы рентген, тыныс алу аппараттары және медициналық құрал-жабдықтар алынды.
– Биыл ауданға қарасты Н.Ілиясов ауылы «Үздік туристік ауыл» номинациясын жеңіп алды. Бұл бір ғана аудан емес, облыстың да мерейі. Осындай туристік ауылдарды көбейту жоспарда бар ма?
– Нағи ауылының «Үздік туристік ауыл» номинациясын жеңіп алуы біз үшін үлкен мақтаныш. Аудан көлемінде туризмді дамыту бағытында тиісті жұмыстар жасалуда. Қызылорда облысы күн санап туризм бағытын дамытып келеді. Соның ішінде Сырдария ауданы – тарихы терең, табиғаты бай, келешегі кемел аймақтардың бірі. Бұл ауданның туризм саласындағы әлеуеті зор, оны дұрыс бағытта дамыта білсек, еліміздің танымал туристік орталықтарының қатарына енуі әбден мүмкін.
Сырдария ауданында туристік әлеуетті дамыту мақсатында нақты қадамдар жасалуда. «Батыс Еуропа – Батыс Қытай» халықаралық дәлізі аудан арқылы өтеді. Осы жол бойында екі бірдей қызмет көрсету кешені жұмыс жасауда. Бұл нысандар арқылы жылына 3000-нан астам туристке қызмет көрсетуге мүмкіндік бар.
Көне тарихтың көзі Сыр бойындағы қалашықтар деуге болады. Сырдария – аты айтып тұрғандай, қазақ даласының күре тамыры саналатын Сыр өзенінің бойын жағалай орналасқан аудан. Бұл өңір – ежелгі өркениеттер мен Ұлы Жібек жолының ізін сақтап қалған құтты мекен. Аудан аумағында орта ғасырларға тән бірнеше көне қала орындары сақталған. Соның ішінде Асанас, Қышқала, Қосасар секілді тарихи қалашықтар – археологтардың да, туристердің де қызығушылығын тудырып отыр. Археологтардың айтуынша, бұл қалалар XII-XIV ғасырларда өркендеген, сауда мен қолөнердің орталығы болған. Бүгінде бұл нысандарды тарихи-танымдық туризм нысаны ретінде қайта жаңғыртып, келушілерге арнайы маршруттар жасақтау жоспарлануда. Сырдария ауданы бойынша 60 тарихи-мәдени ескерткіш мемлекет қорғауына алынған. Оның ішінде 4-республикалық маңызы бар (Мүлкалан кесенесі, ХVІ ғ., Сырлытам кесенесі, ХІІІ ғ. Асанас кесенесі, ХVІІ ғ. Қожан қожа кесенесі, ХVІІІ ғ.), 14 жергілікті маңызы бар және 44 ескерткіш алдын ала тізімге алынған. 60 ескерткіштің 15-і археологиялық, 45-і қала құрылысы және сәулет ескерткіші болып бөлінеді. Осы ескерткіштерді де тарихи орындар ретінде пайдаланып, туристік қызметті дамытуға жұмыс жасаймыз.
– Аудандағы жол сапасы мен көлік қатынасы мәселесі қалай шешіліп жатыр?
– Өткен жылдың қорытындысымен аудандық маңызы бар автомобиль жолдарының жақсы және қанағаттанарлық жағдайы 99% болды. Бұл көрсеткішті биыл жыл қорытындысымен 100%-ға жеткізу межеленген.
Ауданға қарасты кент және елді мекендерде, жалпы ұзындығы 238,3 шақырымды құрайтын 227 көше бар. Оның ішінде 198,6 шақырымы асфальтты жолдар, қалғаны қиыршық тас төселген және қарапайым қатынас өзегі. Бүгінгі күнге ішкі жолдардың жақсы және қанағаттанарлық жағдайы 82% құрап отыр. Биыл жол саласын дамыту жоспары бойынша бүгінге дейін 1184 млн теңге көлемінде қаржы бөлінді.
Оның 612,4 млн теңгесі облыстық, қалғаны аудандық бюджеттен қаралған. Атап айтқанда, облыстық бюджет есебінен «Шаған» ауылында 3 көшеге, «Шіркейлі» ауылдық округіндегі Б.Жақыпов көшесіне күрделі жөндеу, С.Сейфуллин ауылында Ә.Байназарұлы, М.Арықұлы, З.Әбілдаұлы көшелерінің автомобиль жолын күрделі жөндеу жобалары. Сондай-ақ жалпы ұзындығы 10,2 шақырымды құрайтын аудандық маңызы бар «Қызылорда-Аэропорт-Қоғалыкөл-Шіркейлі» автомобиль жолын орташа жөндеуге аудандық бюджеттен 571,6 млн теңге бөлініп, тиісті жұмыстар атқарылуда.
– Қазір жаз мезгілі болғандықтан таза ауызсуды тұтыну көлемі артатыны белгілі. Аудан түгілі, қала орталығында да кей кезде ауызсудың қысымы төмендеп кетеді. Мұндай мәселе сіздерде бар ма?
– Ауданда тұрғындарды сапалы ауызсумен қамту жұмыстары жүйелі жүргізілуде. Негізінен, аудан халқы 100 пайыз орталықтандырылған ауызсумен қамтамасыз етілген. Дегенмен, «Сырдария аудандық оқшау сумен жабдықтау жүйелерін пайдаланушы» өндірістік бөлімшесімен бірлесе жүргізілген зерделеу барысында тозығы жеткен су жүйелері анықталып, қайта жаңғырту жұмыстары жүргізіліп келеді.
«Қуатты өңірлер – ел дамуының драйвері» бағдарламасымен 725 млн теңгеге Тереңөзек кенті, «Шаған», «Қоғалыкөл», Аманкелді ауылдарында 14,5 шақырым ауызсу құбырлары қайта жаңғыртудан өтті. Аудандық бюджет есебінен 22 млн теңгеге Аманкелді, «Қоғалыкөл», «Шіркейлі» және Н.Ілиясов елді мекендерінің су мұнаралары жаңарды, 118 млн теңгеге Сәкен Сейфуллин және «Іңкәрдария» ауылдарында қосымша барлау-өндірістік ұңғымасы орнатылып, пайдалануға берілді.
Соңғы 2 жылда 9 ауылдық елді мекеннің су мұнарасы мен оған қажетті құрылғылар ауыстырылды.
– Білуімше сіздің мамандығыңыз құрылысшы. Ауданда құрылыс қарқыны қандай? Олардың сапасын өзіңіз қадағалайтын боларсыз…
– Әрине, қазіргі таңда аймақ басшысының негізгі талаптарының бірі – құрылыс сапасына мән беру, жоғары деңгейде жұмыс жүргізу. Аудан көлеміндегі құрылыс жұмыстарын аудандық мәслихат депутаттары, қоғамдық кеңес пен азаматтық институт өкілдерімен бірге тұрақты түрде бақылауға алғанбыз.
– Сырдария ауданының негізгі экономикалық тірегі – ауыл шаруашылығы. Бұл салада қандай жетістіктер мен қиындықтар бар? Шаруалардың жайы қалай? Шағын және орта кәсіпкерлік туралы айтарыңыз бар ма?
– Әр сала бойынша айтатын болсақ, ауданда биыл 35 899 гектарға егін екті. Оның ішінде, күріш 22704, жаздық бидай 2000, арпа 40, мақсары 600, жаңа жоңышқа 2200, картоп 145, көкөніс 240, бақша 420, ескі жоңышқа 7400 гектарды құрап отыр. Шаруашылық құрылымдары 6455 гектар жоңышқадан (І орым) 6455 тонна шөп жинап, орта өнім 10 центнерден келді.
– Биылғы егіске 5250 тонна күріш тұқымы құйылды. Оның ішінде «Айсара», «Лидер», «Янтарь», «Яхонт», «Патриот», «Маршал» сорттары бар. Қажетті 10 600 тонна минералдық тыңайтқыш толық сатып алынды. Көктемгі дала жұмыстарын жүргізуге барлығы 780 дана ауыл шаруашылығы техникалары қатысты. Үкімет тарапынан көктемгі дала жұмыстарына қажетті 1983 тонна дизель отыны шаруашылық құрылымдарына жеткізілді. Биыл шаруашылықтар 3500 гектар жерге лазерлік тегістеу жұмыстарын жүргізіп, нәтижесінде ауданда күріш алқаптарының 55,1 пайызы тегістелді. Бұл меже жыл соңына дейін 63 пайызға жеткізіледі. «Қазсушар» РМК облыстық филиалымен 118 шаруа қожалық суға келісім шартқа отырды. Ауданда барлығы 81 дана насос қондырғысы бар. Оның ішінде, шаруашылықтар егінге 34 дана насосты пайдалануда.
«Қазсушар» РМК-да 13 дана, оның 11-і қашыртқылар бойына орнатылған. Ауылдық округтерде 33 дана насос аяқсумен қамтамасыз ету үшін жұмыс істеп тұр.
Тұрғындардың өзін-өзі әлеуметтік маңызы бар картоп, көкөніс, бақша өнімдерімен қамтамасыз ету мақсатында егіс алқаптарынан 175 гектар қосымша жер ашылып, 780 адам егін екті.
Техникалық саясатты жетілдіру және машина-трактор паркін жаңарту жұмыстары соңғы жылдары қарқынды жүргізілуде. Қазіргі кезде шаруашылықтар шетелдік заманауи, жоғары технологиялық ауыл шаруашылығы техникаларына басымдық беріп келеді.
Аудан бойынша ауыл шаруашылығы құрылымдарынан 17 дана техника статистика бөліміне тіркеліп, негізгі қорға 405 млн 682 мың теңге салынды. Өткен жылдың осы кезеңімен салыстырғанда мүйізді ірі қара 28,2 (38819 бас), жылқы 100 (28662 басқа), құс 3,6 (13419 басқа), түйе 100 пайызға (1716 басқа) өсті. Осының есебінен өнімділік те артты.
Қазіргі таңда ауданда 128 құрылым мал шаруашылығымен айналысады. Оның ішінде 11 шаруашылық асыл тұқымды түлік өсіруде. Асыл тұқымды 1000 бас мүйізді ірі қара, 4749 бас қой бар.
2025 жылы «Кең дала», «Агробизнес» бағдарламалары бойынша «Аграрлық несие корпорациясы» АҚ-ы, «Сырдария-1» кредиттік серіктестіктері арқылы 15 шаруашылық құрылым егін және мал шаруашылығын дамытуға 3,5 млрд теңге несие алды. Солтүстік Қазақстан облысының агроөнеркәсіптік кешен саласындағы тәжірибесін алмасу бағдарламасы бойынша ауданда қуаттылығы 400 бастан бастап тауарлы сүт фермасын ашу жұмыстары қолға алынды. Жобаның бастапқы құны шамамен – 3,7 млрд теңге.
Ауданда жыл басынан 2698 шағын және орта кәсіпкерлік субъектісі тіркелді. Оның ішінде жұмыс жасап тұрғаны – 2639. Жалпы мемлекеттік және өңірлік бағдарламалар аясында құны 4,1 млрд теңгені құрайтын 81 жобаға қаржылай қолдау көрсетілді. Оның ішінде, құны 4 млрд теңгенің 45 жобасы несие болса, құны 56,6 млн теңгенің 36 жобасы грант қаражаты.
Бағдарламаларға келетін болсақ «Агробизнес» бағдарламасы аясында құны 7,6 млн теңгенің 2 жобасы, «Кең дала 2» бойнша 3,5 млрд теңгеге 13 жоба қаржыландырылды. «Ауыл аманаты» бағдарламасы бойынша құны 109,5 млн теңгенің 13 жобасы оң шешім алып, қаржы бөлінді.
Сонымен қатар, «Ұлттық жоба» шеңберінде жаңа бизнес идеяларды іске асыру мақсатында 1 572 800 теңгеден 36 адамға 56,6 млн теңге көлемінде мемлекеттік қайтарымсыз грант берілді. «ҚазАгроҚаржы» АҚ-ның Қызылорда филиалы арқылы құны 405,6 млн теңгеге 17 ауылшаруашылық техникалары мен құрал-жабдықтары алынды.
Өздеріңізге белгілі, өткен жылы Үкімет басшысы облысқа жұмыс сапарымен келіп, әлеуметтік нысандардың жұмысымен танысты. Сыр еліне сапары барысында ауданға қарасты «Бесарық» ауылындағы «Ауыл аманаты» жобасының жүзеге асуын көріп, оң бағасын берді. Бұл – бәріміз үшін ортақ жетістік. Жалпы «Бесарық» ауылында жеке кәсіпкер ғимарат салып, ауылда кәсіппен айналысқысы келетін тұрғындарға кредит алуына салынған ғимаратты кепілдікке қойып, жағдай жасауда. Бұл жаңа кәсібін бастаған азаматтарға өте қолайлы.
– Сіздерде жер дауы мәселесі көп қозғалады. Қазір мәселе шешімін тапты ма? Тұрғындармен қаншалықты жиі кездесесіз?
– Сырдария ауданы бойынша қоғамдық-саяси және діни ахуал тұрақты негізде сипатталады. Жыл басынан діни шиеленіс тудыратын проблемалық мәселелер орын алған жоқ.
Жер дауы деген мәселеге келсек, дұрыс түсіну қажет, жергілікті атқарушы орган жеке сектор, яғни шаруашылықтың жұмысына араласа алмайды. Ол жерде жер бөлу және тағы да басқа мәселелер жауапкершілігі шектеулі серіктестіктерді құрған құрылтайшылар мен үлескерлердің өзара дауыс беруі арқылы шешіледі. Сол себепті тиісті заңдылықтар мемлекеттік органдар тарапынан түсіндіріледі.
Сырдария ауданына қатысты ауыл шаруашылығы мақсатындағы жер қатынастары бойынша шиеленісті жағдайлар жыл басында орын алған болатын. Мәселе аймақ басшысының бақылауына алынып, тиісті құқық қорғау органдары және сала басшыларымен түсіндірме жұмыстары жүргізілді. Нәтижесінде, тараптар келісімге келіп, жерлерін бөліп алып, толық егіс жұмыстарын жүргізді. Қазіргі таңда мәселе жоқ.
Ал тұрғындармен кездесуге келсек, Мемлекет басшысының тапсырмасына сәйкес жылына екі рет аудан көлеміндегі барлық ауылдарда тұрғындармен кездесіп, еркін форматта сұхбат жүргіземін. Сонымен қатар аудан әкімдігінде кестеге сәйкес әр аптаның жұма күні жеке қабылдау өткізсем, шұғыл мәселелер бойынша күнделікті қабылдауға дайынмын.
– Уақыт бөліп, сұхбаттасқаныңыз үшін рақмет. Еңбеккер елдің несібесі мол болғай. Бастамаларыңызға сәттілік тілейміз!
Айсәуле ҚАРАПАЕВА,«Сыр бойы»,
Қызылорда – Сырдария – Қызылорда.
Суреттерді түсірген Нұрболат НҰРЖАУБАЙ
