Сырдария ауданының полиция қызметкерлері де аудан тұр­ғын­да­рының қауіпсіздігін қам­тамасыз етуде аянбай еңбек етуде. Бөлімдегі қызметкерлердің 93 пайы­зы ерлер болса, 7 па­йы­зы әйел қыз­мет­кер­лер. Ерлермен қатар қо­ғамдық қауіпсіздікті қамтамасыз ету мен құқық бұзушылықты болдырмау, қыл­мыстың алдын алуда және орын алған қыл­мысты дер кезінде ашу бағы­тында жұмыс атқаруда.

Осы күні аудан орталығы Тереңөзек кентінде қоғамдық тәртіпті қам­тамасыз етуге бағытталған 72 бейнебақылау камерасы мен жол қозғалысы ережесін бұзғандарды автоматты түрде анықтайтын 7 «Сергек» бейнекамерасы полиция бөлі­мінің басқаруына берілген. Бұл жаңашылдықтың арқасында құқық бұзушылық пен жол қозғалысын бұзу саны азайғаны көңіл қуантады.

Полиция бөлімі бастығының мін­детін атқарушы, полиция пол­ковнигі Мақсат Сүлейменұлы кәсіби мерекені қарсы алып отырған сырдариялық әріптестерін құттықтап, биылғы жылы бөлім қызметкерлері атқарған жұмыс туралы егжей-тегжейлі айтып берді.

– Полиция күні – халықтың ты­ныш­­тығын күзетіп, қоғам қауіп­сіздігін қамтамасыз ету жолында жанқиярлықпен қызмет атқарып жүрген тәртіп сақшыларына алғыс айтып, жылдағы дәстүрмен құрмет көрсетеміз. Сонымен қатар қызметтік борышын атқару кезінде қаза тап­қан әріптестерімізді еске аламыз. Бүгінде өңірімізде ардагерлер ұйы­мына тіркелген 2500-ден астам зей­неткер болса, ауданда полиция саласында 72 ардагер бар. Біздің қата­рымызда 5 әйел маман қоғамдық тәр­тіп пен азаматтардың қауіпсіздігі жолында қажырлы еңбек етуде. Полиция қызметі – күнмен емес, ел ал­дын­дағы адалдықпен өлшенетін абыройлы міндет. Қоғамдағы тұрақ­тылық пен тәртіптің сақшысы ретінде біздің еңбегіміз әрдайым ел алдында биік бағаланады. Қиындығы мен жауапкершілігі мол осы салада табандылықпен еңбек етіп жүрген әріптестерімді кәсіби мерекемен құт­тық­таймын, – деді полиция бөлімі бас­­тығының міндетін атқарушы Мақсат Сүлейменұлы.М.

Полиция полковнигінің айтуынша, соңғы кезде ауданда есірткі қылмысына қатысты заң бұзушылық бірнеше рет орын алған. Полиция қызметкерлерінің қырағылық танытуының арқасында кент тұрғынының үй ауласындағы сарайының ішінен және үй ішінен сора өсімдігін өсіру дерегі анықталған. Бұл бір ғана дерек емес, зиянды өсімдікке байланысты тағы да қылмыс әшкерелеген. Яғни аудан орталығына жақын орналасқан елді мекен тұрғыны өзімен бірге кептірілген есірткі затын алып жүргені анықталып, заты тәр­кіленген. Өкінішке орай, бұндай дерек биылғы жылы тағы да тіркелген. Кент тұрғыны өз ауласында 11 түп сора өсімдігін егіп, баптаған. Бүгінде қылмыстық іс бойынша заңды шешім қабылданған.

                                       

– Ауданда мал ұрлығына қатысты қылмыс тоқтамай тұр. Полиция бөлімі қызметкерлерінің жедел-іздестіру жұ­мысын жүргізу барысында 8 отбасынан 8 бас ірі қара мал ұрлаған 2 адамнан тұратын қылмыстық топ құрықталды. Қылмыскерлер 2024 жылдан бері мал ұрлығымен айналысқан. Қазіргі уақытта отбасыларға келтірілген шығын өтеліп, қылмыскерлерге заң­ды шара көрілді, – дейді полиция полковнигі.

Полиция бөлімінің жергілікті полиция қызметі бөлімшесінің учаскелік полиция инспекторлары да әкімшілік аймақтарында қылмысты алдын алу, болдырмау бағытында нәтижелі жұ­мыс жүргізуде. Профилактикалық іс-шаралардың нәтижесінде, ауданның бірнеше елді мекенінде, атап айтқанда С.Сейфуллин, Қоғалыкөл, Амангелді, Жетікөл, Айдарлы ауылында жыл басынан бірде-бір қылмыс тіркелмеген. Бұл – ерекше атап өтерлік жағдай.

Қоғам өміріне белсенді араласатын полиция қызметкерлері спорттық және мәдени іс-шараларға белсенді қатысуды дәстүрге айналдырған. Осы жылдың мамыр айында аудан меке­мелері арасында Қазақстанның Құрметті құрылысшысы және мемле­кеттік қызметтің үздігі Асылбек Әбдуовты еске алуға арналған аудан­дық турнирге «Сыр сақшылары» коман­дасы белсенді қатысты. Команда құрамындағы спортшылар бір­неше спорт түрінен сайысқа түсіп, командалық есепте екінші орын иегері атанды. Сонымен қатар Қызылорда облысы полиция департаментінің қызметкерлері арасында «Абай – дара қазақта» атты әдеби сайыста сырдариялық полиция қызметкерлері жүлделі үшінші орын алды.

Ерекше жауапкершілікті қажет ететін салада сегіз қырлы, бір сырлы азаматтардың қызмет етуі – ішкі істер саласында қызмет ететін азаматтардың тек кәсіби біліктілігімен ғана емес, рухани және мәдени әлеуетімен де ерекшеленетінін көрсетеді.