Елімізде ауқымды санақ жүргізіледі
Елімізде Ұлттық ауыл шаруашылығы санағы өткізіледі. Аталған санақ республика көлемінде 1 тамыз және 20 қазан аралығында жүзеге асады деп күтілуде. Ең алдымен, еліміздің 70 қаласында жеке қосалқы шаруашылықтарды алдын ала аралау жұмысы жасалады. Бұл жұмыстарға 1-30 маусым аралығында мамандар тартылмақ.Шын мәнінде, Ұлттық ауыл шаруашылығы санағына дайындық осыдан 1,5 жыл бұрын басталған. Ауқымды жобаның мақсат-міндеті айқындалған. Жалпы алғанда ауыл шаруашылығының нақты жай-күйі жөнінде толық ақпарат алуға мүмкіндік зор. Өндіріс тиімділігі мен өнімнің бәсекеге қабілеттілігін арттыруға бағытталған әлеуметтік-экономикалық саясатты әзірлеуге жағдай қарастырылған. Сонымен қатар шаруашылық жүргізуші субъектілердің жалпы санын жаңарту да көзделген.
«Санақтың негізгі кезеңі 1 тамыз бен 20 қазан аралығын қамтиды. Онлайн және офлайн кезеңдерге бөлінеді. Алдымен 1-31 тамыз аралығында sanaq.gov.kz сайтында онлайн-сауалнама жүргізіледі. Заңды тұлғалар, фермерлер, үй шаруашылықтары – барлығы порталдағы санақ парақтарын қашықтан өз бетінше толтыра алады», – деді ҚР СЖРА Ұлттық статистика бюросының басшысы Мақсат Тұрлыбаев.
Ауыл шаруашылығы санағына заңды тұлғалар, жеке кәсіпкерлер, сондай-ақ жеке қосалқы шаруашылық жүргізу үшін жер учаскелері бар және ауыл шаруашылығы жануарлары бар үй шаруашылықтары, оның ішінде мал шаруашылығы, өсімдік шаруашылығы және балық шаруашылығымен айналысатын шаруа немесе фермерлік қожалықтар қатысады. Санақ жұмысын жүргізу барысына жұмыссыз жандар тартылмақ. ҚР Еңбек және халықты әлеуметтік қорғау министрлігінің хабарлауынша, 300 азамат еліміздің 70 қаласында өтетін санақ жұмысына интервьюер ретінде шақырылмақ. Жұмысқа тартылған жандар үй аралап, азаматтардан сауалнама алады.
Бұған дейін елімізде ірі масштабтағы Ұлттық ауыл шаруашылығы санағы 2006 және 2021 жылдары өткізілген. Арнайы бюджеттен қомақты қаржы бөлініп өткізілетін санақтың аграрлық саланың өркендеуіне септігі зор.
«Тт» ақпарат
Фото: Ашық дереккөзден
