Балықтың ағзаға пайдасы: табиғаттан келген денсаулық көзі

Балық – адам ағзасына аса пайдалы, құнды тағам түрлерінің бірі. Оның құрамында ақуыз, дәрумендер мен пайдалы майлар көп, сондықтан да дәрігерлер мен диетологтар балықты тұрақты түрде тұтынуға кеңес береді. Балықты дұрыс әрі жиі қолдану жүрек-қан тамырлары ауруларының алдын алып, иммунитетті күшейтіп, ми қызметін жақсартуға ықпал етеді.

Балық – сіңімді әрі сапалы ақуыз көзі. Оның құрамындағы ақуыз ағзадағы бұлшық еттерді қалпына келтіруге, жасушалардың жаңаруына және энергия өндіруге қажет. Балық еті – ет өнімдеріне балама ретінде жүрекке жүктемені азайтып, асқазан-ішек жолына жеңіл түседі. Балықтың басты байлығы – омега-3 май қышқылдары. Бұл қышқылдар ағзада өздігінен түзілмейтін болғандықтан, оларды тағам арқылы қабылдау қажет. Омега-3 жүрек ауруларының алдын алады, қан қысымын реттейді, холестерин деңгейін төмендетеді және ми қызметін жақсартады. Әсіресе, скумбрия, лосось, тунец, сардина сияқты майлы балықтарда омега-3 көп мөлшерде кездеседі.

Балықта А, D, В12 дәрумендері, селен, фосфор, йод сынды маңызды элементтер бар. А дәрумені көру қабілетін жақсартады, В12 жүйке жүйесінің дұрыс жұмыс істеуіне қажет, ал D дәрумені сүйек пен тіс саулығына әсер етеді. Йод – қалқанша безінің қызметі үшін аса маңызды.

Балықты үнемі тұтыну есте сақтау қабілетін арттырып, күйзеліс пен депрессияның алдын алады. Зерттеулерге сәйкес, балық жейтін адамдардың Альцгеймер ауруына шалдығу қаупі төменірек болады.

Балық – балалардың өсіп-жетілуіне, мидың дамуына аса пайдалы. Жүкті әйелдердің рационында балықтың болуы іштегі баланың жүйке жүйесінің қалыптасуына оң әсер етеді. Алайда бұл кезде сынап мөлшері аз балық түрлерін таңдау қажет.

Балық – табиғат сыйлаған ең пайдалы тағамдардың бірі. Оны аптасына кемінде екі рет тұтыну денсаулықты нығайтып, түрлі аурулардың алдын алады. Дұрыс таңдалған, сапалы және дұрыс пісірілген балық – ұзақ әрі салауатты өмірдің кепілі.

Мұрат Алтынай
Қорқыт ата атындағы Қызылорда университетінің 4 курс студенті
Фото: Н. Нұржаубай