Апта ағымында аудан әкімдігінің мәжіліс залында жиын өтіп, онда аудандағы маңызды мәселелер қозғалды. Күн тәртібінде үш негізгі мәселе қаралып, тиісті сала басшылары баяндама жасады.

Атап айтар болсақ, бірінші мәселе аудандағы құрылыс саласы бойынша атқарылған жұмыстар мен алдағы міндеттер туралы болды. Бұл бойынша аудандық құрылыс, сәулет және қала құрылысы бөлімінің басшысы Нұржан Бисембаев хабарлама жасады. Бөлім басшысы ағымдағы жылы жүргізіліп жатқан жұмыстар және ұсынылған жобалар бо­йынша елді мекендерді электрмен жабдықтау, инженерлік-коммуникациялық инфрақұрылымдар құрылысы және антенна-діңгектері құрылысы жобаларына тоқталып, республикалық, облыстық және аудандық бюджеттен қаржыландыратын жобалардың жұмыс жоспарлары туралы ақпарат берді.

Екінші мәселе аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінде атқарылған жұмыстар мен алдағы міндеттер туралы болды. Бөлім басшысы Мейірхан Бақытжанұлы 2024 жылы ауданның жол саласын дамытуға бюджеттен барлығы 1,4 млрд теңге бөлініп, 21,7 шақырымды құрайтын 26 көшенің автомобиль жолдары жөндеуден өткізілгенін, сонымен қатар, жол белгілерін орнату және күтіп ұстау, елді мекендерді ауызсумен қамтамасыз ету, газдандыру және көппәтерлі тұрғын үйлерді жөндеу жұмыстары жайында баяндады.

Ал күн тәртібіндегі үшінші мәселе – Айдарлы ауылдық округінде атқарылған жұмыстар және алдағы міндеттер туралы ауылдық округ әкімі Нұрбол Жұмабеков хабарлама жасады. Елді мекенде өткен жылы бірқатар жобалар іске асқан. Атап айтқанда, 2024 жылы мемлекеттік гранттар мен несиелендіру бағыттары бойынша 93,9 млн теңгеге 10 жоба қаржыландырылған. Айдарлы ауы­лы «Үлгілі елді мекен» байқауының жеңімпазы атанғаны да баспасөз бетінде ақпараттандырылды. Сонымен қатар, ауылдық спорт мектебі қайта жабдықталды.

Өз кезегінде аудан басшысы күн тәртібіндегі негізгі мәселелерге орай нақты тапсырмалар берді. Ал тапсырманың орындалуы – құзырлы органдардың қатаң бақылауында. «Тапсырма тиісті деңгейде орындалмаса, қатаң шешім қабылданады» деді аудан әкімі. Әкімдік отырысында одан бөлек кент келбеті мен «Таза Қазақстан» эко­логиялық акциясының өткізілу барысы туралы қосымша мәселелер қаралды.