Күн тәртібі бойынша «Қараусыз ауыл шаруашылығы және үй жануарларына қарсы күрес бойынша жүргізіліп жатқан жұмыстар туралы» (баяндамашы аудандық ауыл шаруашылығы және жер қатынастары бөлімінің басшысы Қанат Нұрсейіт) және «Алаяқтық қылмысының, оның ішінде интернет алаяқтық қылмыстардың алдын алу шаралары туралы» (баяндамашы ауданының полиция бөлімі бастығының орынбасары Әділхан Қанзадаев) екі бірдей мәселе қозғалды.

Комиссия отырысында құқық қорғау органдары мен тиісті сала басшылары баяндама жасап, өзекті мәселелер талқыланды. Аудан әкімінің орынбасары құқық бұзушылықтың алдын алу үшін барлық тиісті мекемелердің бірлесіп, жүйелі түрде жұмыс істеу қажеттігін атап өтті:

– Былтырғы жылы аймақ басшысының төрағалығымен өткен облыс әкімдігі жанындағы құқық бұзушылық профилактикасы жөніндегі ведомствоаралық комиссия отырысында алаяқтыққа, оның ішінде қаржы пирамидалары мен интернет алаяқтығына қатысты құқық қорғау органдарына кешенді әрі нақты шараларды әзірлеуді тапсырған болатын. Себебі Елімізде қазір интернет алаяқтығына тыйым болмай тұр. Технологияның тілін мықты меңгерген әккілердің құрығы ұзарып, алдап-арбау әдіс-тәсілдері күн санап мың құбылуда. Қараусыз қалған ауыл шаруашылығы және үй жануарларына қарсы күрес мәселесі де маңызды тақырыптардың бірі болып табылады. Бұл мәселе тек жануарлардың өзіне ғана емес, қоршаған ортаға, адам қауіпсіздігіне және санитарлық жағдайға да үлкен әсер етеді. Бүгінгі комиссия отырысында біз осы түйіткілді мәселелердің шешу жолдарын қарастыру үшін тиісті шараларды мерзімінде және сапалы атқару мәселесін қарастырамыз, – деді Димаш Серікбайұлы.

Комиссия отырысының қорытындысы бойынша аудан әкімінің орынбасары құқық қорғау органдары мен тиісті сала басшыларына тапсырмалар беріп, тиісті шаралар қабылдау жөнінде шешімдер қабылданды.