Жолдаудың мән-мазмұны – әр азаматқа теңдей мүмкіндік береді
Мемлекет басшысы Қасым-Жомарт Тоқаевтың Парламенттің кезекті сессиясының ашылуында «Әділетті мемлекет. Біртұтас ұлт. Берекелі қоғам» атты Жолдауын жариялады. Маңызды жиында Президент барша халық қалаулыларына елмен етене араласып, мұң-мұқтаждарымен танысып жүргені үшін ерекше ризалығын білдірді.Жолдаудың мән-мазмұны – әр азаматқа теңдей мүмкіндік беретін өркениетті Әділетті Қазақстанды құру. Міне, бүгінде Президент бастамасымен бірқатар жұмыс іске асырылды. Атап айтсақ, келешек ұрпақты тәрбиелейтін білікті ұстаздардың жалақысы 2000 жылдан бері екі есе өсті. Дәрігерлердің айлығы да айтарлықтай көбейді. Отандастарымызға зейнетақы жинағының бір бөлігін пайдалану мүмкіндігі берілді.
Жаңа жылдан бастап балалардың есепшотына қаражат түсе бастады. Сондай-ақ «Халық үніне құлақ асатын мемлекет» қағидаты нақты іске асырылып, жүйелі жалғасып келеді.
Бұған қоса «Жайлы мектеп» жобасы аясында 2025 жылға дейін 800 мың баланың заманауи мектепте оқуына жағдай жасалады. Осылайша апатты жағдайдағы және үш ауысымен оқитын мектеп мәселесі толық шешіледі деп жоспарланып отыр. Қазір елімізде денсаулық сақтау нысандары салынып жатыр. Ұлттық жоба аясында 32 аудандық аурухана заманға сай жаңарып келеді.
Президент 2025 жылға дейін жергілікті жолдардың кемінде 95 пайызын жақсарту жөнінде тапсырма бергенін жеткізді. Бұған қоса сарбаздардың қауіпсіздігін қамтамасыз ету және олардың өз міндеттерін орындауы үшін жағдай жасау әскер басшылығының жауапкершілігінде екенін айтты. Қасым-Жомарт Тоқаев Қарулы Күштерде сарбаздар өз Отанына лайықты қызмет етуі үшін заң мен тәртіпті қатаң сақтау қажеттігіне назар салды.
«Жастар әскерге Отан алдындағы борышын өтеуге барады. Жас сарбаздарымыз өз міндетін алаңсыз орындауы үшін әскер қатарында, ең алдымен, темірдей тәртіп болуға тиіс. Қарулы күштер мен басқа да күштік құрылымдар осы талапты мүлтіксіз орындауы қажет. Әр ата-ана әскерге кеткен баласын мемлекетке сеніп тапсырады. Сондықтан сарбаздардың денсаулығы мен қауіпсіздігіне, ең алдымен, армия басшылығы және құқық қорғау мекемелерінің басшылары жауапты», деп нақтылады Қ.Тоқаев.
Жалпы, мемлекет әскери қызметшілерге мейлінше қамқорлық жасап келеді. Оларға ай сайынғы тұрғын үй төлемдері, баспананы жекешелендірудің орнына ақшалай өтемақы төлеу жалғасып жатыр. Әскери қызметшілерге тұрғын үй төлемдерін жүзеге асыру негізгі әлеуметтік қолдау болып есептелінеді.
БАКУОВ Марат Бакуұлы
Сырдария аудандық мәслихатындағы
Сырдария аудандық мәслихатындағы
«AMANAT» партиясы депутаттық фракциясының мүшесі,
аудандық мәслихаттың депутаты
