Елордадағы жәрмеңкеге сырдариялықтар да үлес қосты
Астана қаласында Қызылорда облысы тауар өндірушілерінің ауыл шаруашылығы жәрмеңкесі өтті. Екі күн бойы елордалықтар Сыр өңірінің брендіне айналған күріші, балығы мен ас тұзы, қауын-қарбызы, ұлттық сусындарын саудалады.Облыс бойынша 80-ге жуық Сыр диқандары мен тауар өндірушілерінің құны 270 млн теңге болатын 600 тоннадан астам өнімдері ұсынылды.
Атап айтқанда, 300 тоннадан астам күріш, 6 тонна ет өнімдері, 30 тоннадай балық өнімдері, 80 тоннадан астам көкөніс пен жеміс-жидек, 180 тонна бақша өнімдері, 3 тонна ас тұзы, 15 тоннаға жуық сүт және кондитер өнімдері бар. Жәрмеңкеге сырдариялық диқандар да үлесін қосты.
Биылғы күз маусымында алғаш рет ұйымдастырылған жәрмеңкеге ауданнан 7 көлікпен 95 тонна ауыл шаруашылығы өнімі жеткізілді. Оның ішінде 53 тонна күріш, 40 тонна қауын-қарбыз және 2 тонна ара балы бар. Елорда тұрғындарына өз өнімін ұсынғандардың қатарында «Ақжарма және К» фермерлік қожалығы, Іңкәрдариядан «Даму-Қожеке батыр» ауыл шаруашылық өндірістік кооперативі, Айдарлының қауыны және тереңөзектік «Арна» жеке кәсіпкері бар.
Айту керек, қазір ауданда егін жинау жұмыстары қарқынды жүргізілуде. Жалпы бүгінде Сыр елінің ауыл шаруашылығы өнімдері әлемнің 16 мемлекетіне экспортталуда. Экспортталған өнімнің басым бөлігі – Сыр салысы күріш. Ол Ресей, Беларусь, Әзірбайжан, Тәжікстан, Украина, Моңғолия, Өзбекстан және Ирак мемлекеттеріне жөнелтілуде.
Астана төрінде өткен жәрмеңкеде келушілерге ерекше көңіл-күй сыйлау үшін Сыр елі өнерпаздарының қатысуымен концерттік бағдарлама қойылды.
«Тт» ақпарат
