– Қалжан ахун ауылдық клубында биыл­ғы жоспарға сәйкес «Үйірмеден үйрендім өнер түрін» атты аудандық семинар өтті. Кең көлемде өткен семинарда клубтың тыныс тіршілігі, «Адал адам» мәдени-тәрбие орталығының бұрыш­тамалары таныс­тырылды. Сұхбат-ТІМЕ жобасына ауыл түлегі, өнер иесі «Әзіл әлемі» театрының әртісі Қ.Әлжаппаров шақырылып, көңіл­ді сұхбат өрбіді. Тәжірибе алмасу семинарында әдіскер Г.Сырғабаева үйірме жұмыстарына тоқталды. Жаңа­дан ашылған қуыршақ үйірмесі мүшелерінің өнері тамашаланып, соңы үйірме мүшелерінің концерттік бағдарламасына ұласты, – дейді клуб меңгерушісі биылғы атқарылған жұмыс­қа тоқталып.

Ауданның мәдениет саласында биыл­ғы жылы жүзеге асқан «Адал адам» мәдени-тәрбие орталығының тұжырымдамасы аясында «Мәдениет – өркениет мәйегі» атты аудандық өнер фестивалі де табысты өтті. Бұл жолы «Адал адам» мәдени-тәрбие орта­лығының бұрыштамасымен мәдени ұйым­дастырушысы Г.Иманқұл таныстырып, 7 бағытының мақсатына тоқталды. Көпшіліктің көңілінен шыққан «Сұхбат-ТІМЕ» жобасы да сәтті ұйымдастырылды. Жобаға ауыл мақтанышы, есімі аудан, облыс, тіпті республикаға белгілі, ҚР Президенттік көпсайыс чемпионы Мұрат Бөдеев шақырылды. Фестиваль аясында «Жанұя шуағы» жобасының жұмысы, «АРТ уақыт» жобасында жаңадан ашыл­ған қуыршақ үйірме мүшелерінің өнері тамашаланды. Еріктілер тобы жыл бойы­на жасаған жұмыстарымен таныстырды. Соңы «Ән жырым саған, туған ел!» атты көркемөнерпаздардың концерттік бағдарламасына ұласты.

Клуб жұмысын жандыратын ауыл көркем­өнер­паздары десек, үйірме мү­ше­лері биылғы жылы жетістіктерге жетті. Атап айтқанда халықаралық би күніне орай V республикалық «DANCE ALL STYLES» өнер байқауында «Наз­керім» би тобы бас жүлде иеленді. VI халықаралық балалар мен жас­өспірімдер мен жастарға арналған «KINGS OF DANSE» би байқауында назкерімдіктер бірінші орын иеленді.

«Мәдениет қайраткері» төс­бел­гісінің иегері Әшімхан Оспановтың 70 жылдығына арналған «Өмірі – өнер, ғұмыры – ғибрат» атты облыстық үздік клуб қызметкерлері байқауына клуб әдіскері Гүлжанат Сырғабаева қатысып, жүлдегер атанды. М.Мақатаев атындағы «Кең дү­ние, төсіңді аш, мен келемін» атты рес­пуб­ли­калық көркемсөз оқу шебер­лерінің байқауына қатысқан қалжан­ахундық өнерпаз Аруна Серікбол бірін­ші орын иеленді. «Алау групп» балалар мен жасөспірімдер орталығы ұйымдастырған респуб­ликалық «Бояулар құпиясы» сурет­шілер байқауында Айзере Мұ­зарапова бас жүлде иеленіп, ауыл мәдениетінің мерейін өсірді. Мұнан басқа қалжанахундық өнерпаздар аудан көлемінде ұйымдастырылатын мүшайра, көркемсөз оқу, әншілер байқауынан олжалы оралуда.

Ұлттық салт дәстүрді дәріптеуде клуб жанындағы «Ақ әжелер» ансамблінің орны ерекше. Он саусағынан өнер тамған әжелер Қызылорда қаласындағы Назарбаев зияткерлік мектебінде өткі­зіл­­ген Шетелден келген қонақтарға, білім алушыларға салт-дәстүрді дәріп­теу мақсатында ұйымдастырылған «Ұрпақтар сабақтастығы» атты жобаға арнайы үш мәрте шақырту алған.

Ауыл орталығындағы мәдениеттің ордасы бүгінде айналасы желекке оранған көрікті жерге айналды. Ерте көктемнен бастап клуб маңын көркейтіп, көгалдануына жұмысшы Жалғасбек Көшербаевтың еңбегі ерен. Ала жаздай әсем гүл егіп, жасыл желекке орануына үлес қосып жүрген азамат нағыз еңбек адамы.

– Ауыл мәдениеті мен өнерін дәріп­теуде клуб қызметкерлерінен бөлек жұмыс­шылар да үлес қосып келеді. Жұмысшылардың күшімен клуб маңы жасыл желекке айналды. Қарапайым еңбек адамының тынбай еткен еңбегіне ризамыз. Сонымен қатар клуб қызметкерлері түрлі жоба аясында жетістіктерге жетіп келеді. Ауылда өткізілетін әрбір мәдени іс-шарадан бөлек, ақылы қызмет бойынша жоспарлы жұмыс атқарылуда. Аудан, облыс деңгейінен бөлек республикалық байқауда бақ сынап, жүлдегер атанып жүрген өнерпаздарымыз ауыл мақтанышы. Ауылдан шыққан талант­тардың алғашқы баспалдағы ауыл клубы екенін мақтаныш етеміз, үлкен сахнаға жолдама алып, қанаттанғанына қуанамыз. Киелі мекеннен әлі талай өнерпаздар шығатынына сенеміз, – дейді Дархан Жұбанышұлы.