Акцияға мемлекеттік мекемелер, шағын және орта кәсіп иелері, шаруашылықтар, жомарт жандар демеушілік етіп, балаларға оқуға ең қажетті – мектеп киімдері, сөмкелер және кеңсе тауарларын алып береді. Ең бастысы, халықтың әлеуметтік қорғалмаған топтарындағы балаларды мектепке дайындауға ерекше көңіл бөлінеді. Міне, осы мақсаттағы игі іске аудандағы жомарт жүректі жандар үлестерін қосуда.

Жалпы, «Мектепке жол» акциясы басталған уақыт­­­тан бері аудан бойынша 597 балаға мате­риал­дық көмек көрсетілсе, 2164 бала мемлекет тарапынан бір реттік қаржылай көмек алды.

Қайырымдылық іс-шарасына аудандағы шаруа­шылық құрылымдары септігін тигізуде. Олардың қата­рында «Қызылдихан» шаруа қожалығы бар. Шаруа­шылық биыл да жылдағы үрдістен танған жоқ. №131 Талғат Қозыбаев атындағы мектепте білім алатын 20 ба­лаға 350 мыңнан аса қаржыға мектепке қажетті құрал-жабдықтар алып берді. Шаруа қожалық төрағасы Алданберген Құлбаев жас ұрпақтың сапалы білім алуы үшін жағдай жасауда. Тиісінше, жаңа оқу жылы қар­саңын­да мұндай игілікті істің үлкен көмек екенін атаған ата-аналар өздерінің ризашылықтарын білдіруде.

Бұдан бөлек, шаруашылық тарапынан өзге де демеу­шілік жұмыстар жүргізіліп жатқанын атап өткен жөн. О.Мәлібаев елді мекеніндегі білім ошағы, мәдениет үйіне қаржы­лай қолдау көрсетіп, демеушілік жасап келеді.

Биыл «Қызылдихан» шаруа қожалығы 750 гектар­ға егін егіп, жақында жинап алу қамына кіріспек. Ол үшін техникалары сақадай сай. Білікті басшы А.Құлбаев басқаратын шаруашылық еңбеккерлері биыл да биік межені бағындыруға ниетті.