– Бұл полигонның аудан тұрғындары үшін маңызы зор. Сол себепті аймақ басшысы Нұрлыбек Машбекұлы Нәлібаев қолдау білдіріп, облыстық бюджеттен 475,5 млн. теңге бөлінді. Полигонда тұрмыстық қалдықтарды сұрыптауға мүмкіндік болады. Сондықтан құрылыс жұмыстары сапалы және мерзімінде жүргізілуі тиіс, – деді Берік Әбдіғаппарұлы.

Құрылыс жұмыстарын «Техоснастка-Ремсервис» ЖШС атқаруда. Мердігер мекеме өкілі бүгінде тұрмыстық қатты қалдықтарды сүзгіден өткізетін құдықтар қазылып жатқанын атап көрсетті. Аудан басшысы құрылыс жұмыстарының сапасына мән беруді атап, тиісті салалық орынбасарына тұрақты бақылауда ұстауды тапсырды.

Айта кетейік, полигон шаруашылық және өндірістік аймақтардан тұрады. Өндірістік аймақта тұрмыстық қатты қалдықтарды сұрыптап жинайтын арнайы алаң, сүзгіш құдығы орналасады. Мұнда жылына 3500 тонна тұрмыстық қатты қалдықтар сұрыпталмақ.

Құрылыс жұмыстары аяқталып, полигон іске қосылғанда экологиялық, санитарлық-эпидемиологиялық ахуал жақсарып, қоршаған ортаға және адам денсаулығына оң әсерін болары анық.