№129 Әбірәш Жәмішов атындағы мектеп-лицей базасында жүзеге асқан бозкілем шеберлерінің бәсекесінің ашылу салтанатына аудандық дене тәрбиесі, спорт және туризм бөлімінің басшысы Бағдат Есенов, Шіркейлі ауылының әкімі Талғат Құламқадіров, мекеме басшылары, сала мамандары, жергілікті тұрғындар мен қонақтар қатысты.

№12 Балалар жасөспірім спорт мекте­бінің ұйымдастыруымен өткен жарысты аудандық дене тәрбиесі, спорт және туризм бөлімінің басшысы Бағдат Есенов ашып, әрбір балғын спортшыға сәттілік тіледі.

– Біз қашанда берекесі тасыған ауданның атын әлемге танытқан спорт саңлағының еңбегін жоғары бағалаймыз. Өз уақытысында еркін күресті жанына серік етіп, талай қарсыласының жауырын жерге тигізді. Үнемі өзінің шеберлігінің арқасында дәрежесі жоғары жарыста мықтылық таныта білді. Ғибаратты өмір жолында көптеген шәкірт тәрбиелеп, ауыл баласын барынша шымыр болуға дағдыландырды. Бүгін міне кез келген жас палуанның қарымын бағамдап, күресу өнеріне қанықтық, – деді Бағдат Мырзалыұлы.

Негізінен, жарысқа 14 салмақ дәрежесі бойынша 8 командадан 300-ден аса спортшы бақ сынады. Өз кезегінде ауыл әкімі Талғат Құламқадіров ұлағатты ұстаздың әріптесі Тыныштық Қыстаубаев, шәкірті Алмасбек Сүлейменов, зайыбы Дәмет Қыдырова болмысы бөлек азамат хақында естелігімен бөлісті.

Қайраты басым ұлағатты ұстаз Алтынбек Әсіровке 2006 жылы «ҚР Құрметті спорт қайраткері» атағы берілген. Оның негізгі мамандығы химия-биология пәнінің мұғалімі еді. Білікті маман 300-ге жуық разрядты спортшы шығарса, 70 төреші дайындауға зор үлес қосты. Сонымен қатар 6 спорт шеберін жарыс жолына шығарған тәжірибелі маман атанды. Қашанда бозкілемде қарсыласпен иық теңестіре күрескен палуан осыдан 8 жыл бұрын келместің кемесіне мініп, бақилыққа аттанды.

Жарыс жолына шыққан спорт­шылардың бағы басым болды. Білектің күштілігімен биік тұғырға көтерілген жекелеген балғын пал­уанға арнайы «Диплом», медаль табыс­талды. Ашық біріншілік жыл са­йын өткізілетін болады.