СЫБАЙЛАС ЖЕМҚОРЛЫҚҚА ҚАРСЫ САЯСАТҚА ДЕГЕН ӘЛЕУМЕТТІК ҚОЛДАУДЫҢ ӨСКЕНІ БАЙҚАЛАДЫ

Бұл туралы бүгін Өңірлік коммуникациялар қызметінде өткен баспасөз конференциясында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының міндетін атқарушы Берікбол Байхожаев мәлімдеді.
  Онда «Сыбайлас жемқорлыққа қарсы іс-қимыл туралы Ұлттық баяндама» көрсеткіштеріне тоқталды.
  Сондай-ақ, әлеуметтік зерттеу қорытындысы шықты. Қазақстанның 2015-2025 жылдарға арналған Сыбайлас жемқорлыққа қарсы стратегиясын орындаудың бірінші кезеңінде, сыбайлас жемқорлыққа қарсы саясатқа деген әлеуметтік қолдаудың өскені байқалған.
   "Мәселен, мемлекеттің сыбайлас жемқорлыққа қарсы саясатына сенім деңгейі 2015 жылы 57,9% (2013 жылы - 52% болған), орталық мемлекеттік органдардың сыбайлас жемқорлыққа қарсы саясатына – 64,8%, жергілікті атқару органдардың сыбайлас жемқорлыққа қарсы саясатына – 51% құраған болса, 2017 жылы 2015 жылмен салыстырғанда мемлекеттің сыбайлас жемқорлыққа қарсы саясатына сенім білдірген азаматтар үлесі 17,9%-ға өсті (55,5%-дан 73,4%-ға). Зерттеу қорытындысына сәйкес азаматтардың басым көпшілігі, яғни 81,4% сыбайлас жемқорлыққа жағымсыз қараса, сауалнамаға жауап берушілердің 55,5%-ы сыбайлас жемқорлық деңгейін төмендетуде өзінің жеке үлесін қосуға дайын екендігін білдірген", - деді Б.Байхожаев.