Бесарық – «Үлгілі елді мекен»

«Үлгілі елді мекен» конкурсы биыл екінші мәрте өткізіліп, жеңімпаздар марапатталды. Конкурс нәтижесінде ауданға қарасты Бесарық ауылы жыл бойы жүргізілген нәтижелі жұмыстардың қорытындысында «Үлгілі елді мекен» номинациясы бойынша І орынға лайық деп танылды.

Марапаттау іс-шарасында аймақ басшысы «Бірге: Таза Қазақстан» экологиялық акциясы өңірде жүйелі ұйымдастырылып жатқанын айтты. Сондай-ақ тазалық сақтау, қоғам тазалығына бей-жай қарамай жалпыхалықтық сенбіліктерге атсалысу – әрбір азаматтың парызы екенін атап өтті.

– Мемлекет басшысының бастамасымен қолға алынған «Бірге: Таза Қазақстан» экологиялық акциясына биыл облыстың 11 мыңнан астам тұрғыны ерікті түрде қатысып, туған жердің таза­лығына үлес қосты. Осы ретте ауыл-аймақты көркейтуге, көгалдандыруға белсенді қатысатын елді мекендерді ынталандыруды қолға алдық. Бұл мақсатқа облыстық бюджеттен 1 млрд теңгеге жуық қаржы бағыттап, «Үлгілі елді мекен» конкурсын ұйымдастырдық. Биылғы бірінші жартыжылдықта өткен конкурсқа аймақ халқы белсенді қатысып, жеңімпаз 6 елді мекенге күнделікті тұрмысқа ең қажетті деген заманауи үлгідегі 14 арнайы техника берілді. Қызыл­ордалықтардың белсенділігін ескере келе конкурсты күзде екінші мәрте ұйымдастырдық. Ауыл-аймақтың ажарын айшықтап, келбетін көркем етуге бағытталған «Үлгілі елді мекен» конкурсы аудан орта­лықтары мен ауылдар арасында дәстүрлі түрде жалғасады. Бұл бастаманы аға буын өкілдері қолдап, оң бағасын беруде. Аудандарға тапсырылған техника­лар мен автокөліктер тұрғындардың қызметіне жарайды деп сенемін, – деді құттықтау сөзінде аймақ басшысы.

«Үлгілі елді мекен» номинациясы бойынша І орын иеленген Бесарық ауылының марапаты аудан әкімі Б.Сәрменбаев пен Бесарық ауылы әкімінің міндетін атқарушы Ғ.Қаюповқа тапсырылды. Марапаттау іс-шарасынан кейін аудан әкімі жыл бойы жүргізілген жұмысты елеп, ескеріп, марапатқа лайықты деп тапқан облыс басшысына, комиссия мүшелеріне ризашылығын білдірді.

Осы ретте Бесарық ауылының қысқаша тарихына зер салсақ, 1950 жылы қазан айында елді мекендер біріктіріліп, майда колхоздар ірілендіріліп жатқан тұста Бесарық қыстағы колхоз болып құрылған. Колхоз алғашында жыр алыбы Жамбыл есімімен аталған. Ал 1973 жылы КСРО-ның 50 жылдығы атындағы кеңестік шаруашылық құрылып, шаруашылық басшысының іскерлігі арқасында жаңа ауыл қалыптасқан. 1992 жылдан бастап КСРО-ның 50 жылдығы атындағы кеңшардың орнында ежелгі атын иеленіп Бесарық атанды. Бүгінде ауылдың әлеуеті артқан. Елді мекеннің тазалық жұмыстарына «Абай Дәулет» серіктестігі тарапынан техника  бөлінген. Сондай-ақ ауылдағы мекеме ұжымдары мен ерікті жастар елді мекен тазалығын қалыптастыруға белсене атсалысуда.

Ақтөре Ибрагимұлы