Тұрғын үйлердің қасбеті жаңартылуда

«Өңірдің дамуында демеушілердің еңбегі орасан зор». Бұл аймақ басшысының облыстық мәслихаттың сессиясында айтқан сөзі. Иә, расында да бірлігі бекем Сыр өңірінде демеушілер көркем тірліктің үлгісін көрсетіп, көптеген игі істерді атқаруда. Мәселен, облыста жанашыр азаматтардың қолдауымен жүргізіліп жатқан жұмыстардың жалпы құны 30 млрд теңгеден асып жығылады. Бұл бір емес, бірнеше ауданның бюджетінен көп қаржы.

Игілікті істер серпінді Сырдария ауданында да жүйелі жүргізілуде. Бірер жыл бұрын кәсіпкерлердің қолдауымен ауданымызда бірнеше балалар ойын алаңы салынып, пайдалануға берілді. Биыл да бұл үрдіс жалғасын тауып, аудан басшысының ұсынысымен кент орталығындағы көпқабатты үйлердің қасбеті жаңартылуда. А.Иманов көше­сіндегі үйлерде жүргізіліп жатқан жұ­мыстар күз айының соңына дейін аяқ­талатын болады.

Тереңөзек кентінің әкімі Е.Бахтияровтың айтуынша, тұр­ғын үй­лер­дің қасбеті толықтай демеу­шілер­дің көмегімен жүргізілуде. Бұл жұмысқа бюджеттен қаржы бөлінбеген.

– Аудан басшысы демеушілерге ұсыныс айтып, тұрғын үйлердің қас­бетін жаңарту бастамасын көтерген болатын. Ұсыныс қолдау тауып, бүгін­де үш үйдің қасбеті жаңартылуда. Бұл жұмыстар «Универсал Строй Сервис», «Real Stroy Invest» және «Айдарлы Алтын» серіктестіктерінің есебінен жүргізілуде. Қазір жұмыстардың басым көпшілігі аяқ­талды. Алдағы уақытта да кенттің А.Иманов көшесінің бойындағы басқа да үйлердің қас­бетін жаңарту жос­­пары­мызда бар. Бұл жұ­мыс­­тар кезең-ке­зеңімен жүр­гізі­леді. Қол­­дау білдіріп, кентіміздің көр­кеюі­не атсалы­сып жат­қан азамат­тар­ға айтар алғы­сы­мыз шексіз, – дейді кент әкімі.

Естеріңізде болса, біз ау­­дан­дық газет­тің 5 тамыз күнгі нө­мі­­­рінде «Абаттандыру жұмыстары жүр­­гізілуде» тақырыбында мақала жариялаған болатынбыз. Сол мақалада А.Иманов көше­сіндегі көпқабатты тұрғын үйлердің ауласы абаттандырылатыны жазылған еді. Бұл жұмыстар аудан әкімінің бақылауында. Бұйырса, бұл маң кент­тің А.Әлиакбаров көшесіндегі тұрғын үй­лер­­­­­­­­­­­дің ауласы секілді жаңаратын болады.

Мұнан бөлек кенттегі «Сыр сұлу» монументі де жаңа кейіпке енбек. Қазір жұмыстар басталып, құм үйю, тегістеу жұмыстары жүргізілуде. Газет­тің келесі санында демеушілік арқылы атқарылып жатқан игі іс туралы толығырақ жазатын боламыз.

«ТТ» ақпарат