Қоғамдық кеңес отырысы өтті

Аудандық қоғамдық кеңестің кезекті отырысы өтті. Оған аудандық қоғамдық кеңес төрағасы М.Еспенбетов төрағалық етіп, күн тәртібінде бірқатар мәселе қаралды.

Кеңес отырысындағы бірінші мәселе Тереңөзек кенті бойынша І тоқсанда атқарылған жұмыстарға қатысты болды. Ол туралы Тереңөзек кентінің әкімі Ержан Бахтияров есеп берді. Кент әкімі аудан орталығын көркейту-көгал­дан­дыруға басымдық берілгенін жеткізді. Атап айтқанда, орталық Аманкелді Има­нов көшесінде жасыл белдеу жұ­мыс­­тары жүргізілуде. Аталған ау­мақ­қа тал көшеттері отырғызылып, шар­­бақ­­тармен қоршалануда. Мұндай жұ­мыс­­тар «Қызылорда-Жалағаш» авто­жолы бойындағы «Рассойл» жанар-жағар­­май бекеті мен «Кіші қалған» каналы аралығында да жүргізіліп жатыр. Оның ұзындығы 750 метрді құрайды және бүгінде жер тегістеліп, арық қазу жұмыс­тары аяқталған. Алдағы уақытта көшеттер отырғызылмақ. Одан бөлек кент көшелеріндегі электр желілеріне кедергі келтіріп тұрған ағаштарды бұтау, балақтау, сонымен қатар бұталған шы­бықтардан тазарту жұмыстарын жүр­гізілуде. Атап айтқанда, Ә.Тәжібаев, А.Құнанбаев, Қ.Қазантаев, А.Иманов, Р.Ал­шынбаев, 1 мамыр, Қазақ, А.Әлиак­баров көшелеріндегі ағаштар 4 метр биіктіктен кесіліпті.

Е.Бахтияров бүгінгі таңда Тереңөзек кентіндегі «Майжарма» каналын абаттандыру, И.Тоқтыбаев көшесін орташа жөндеу, Айтбай арық көшесіне асфальт жабындысын төсеу жұмыстары жүргізіліп жатқанын атап өтті. Аудан орталығындағы атқарылып жатқан жұ­мыс­тарға қоғамдық кеңес мүшелері оң баға беріп, өз ұсыныстарын айтты.

Күн тәртібіндегі келесі мәселе егінге қажетті су мөлшеріне қатысты болды. Бұл бойынша «Сырдариясушар» өндірістік учаскесінің бөлім басшысы Бағлан Са­ғындықов баяндады. Ол биылғы егінге қажетті су мөлшеріне тоқталды. Негізі, 2023 жылғы индикативтік жоспар негізін­де аудан бойынша жалпы егіс 25319 гектар болса, оның ішінде күріш 20035 гектарға егіледі деп жоспарланған. Егіс науқанының басталуына байланысты «Қазсушар» РМК Қызылорда филиалынан су алу көзіне (водозабор) 825,20 млн текше метр су лимиті бөлінген. Ал экологиялық жағдайды жақсарту мақса­тында 300,0 млн текше метр су лимиті қаралған. Осының аясында биылғы қаң­тар, ақпан, наурыз және сәуір айларында көлдер мен шабындықтарға нақты 80,40 млн текше метр су көлемі жіберіліпті. Бұл мәселелер бойынша да кеңес мүшелері өздерінің ой-пікірлері мен ұсыныстарын ортаға салды.

Қоғамдық кеңес жұмысында кеңес жа­нындағы «Экономика, қаржы және жұ­­мыспен қамту, кәсіпкерлік, инвестиция және инновациялық даму, сыбайлас жемқорлыққа қарсы іс-қимыл жөніндегі комитет» құрамына өзгеріс енгізілді. Осы­лайша, күн тәртібіндегі барлық мәсе­ле талқыланып, аудандық қоғамдық ке­ңес мүшелері ұсыныстарын білдірді.

«ТТ» ақпарат