200 мың гектар жер қайтарылуы тиіс

Ауданда «AMANAT» партиясы облыстық филиалы жанын­дағы «Жер аманаты» комиссиясының көшпелі отырысы өтті. Оған партияның облыстық филиалының және партия жанындағы облыстық «Жер аманаты» ко­мис­сиясының төрағасы Наурызбай Байқадамов, партия филиа­лының Атқарушы хатшысы Ләйлә Төрешова, аудан әкімі Берік Сәрменбаев және комиссия құрамындағы депутаттар, сала мамандары және құзырлы органдар мен прокуратура өкілдері қатысты.

Жерге қатысты елімізде мәселе көп. Осыған байланысты «AMANAT» пар­тиясы «Жер аманаты» жобасын іске қосып, жерге қатысты мәсе­ле­лер­ді шешуге жұмыстар жүргізуде. Оның қатарында заңсыз берілген, иге­ріл­мей жатқан жерлер мен жа­йы­лым­дыққа қатысты мәселе­лер бар.

Көшпелі отырысты ашқан Наурызбай Байқадамов осы мәселе бойынша өңірде атқарылып жатқан жұмыстарға тоқталды.

– Өткен жылы жоба аясында еліміз бойынша 5 млн гектар заңсыз алынған немесе пайдаланылмай жатқан жерлер мемлекет меншігіне алынса, біздің өңірде көлемі 157 мың 113,1 гектарды құрайтын 256 жер учаскесі мемлекет меншігіне қайтарылды. Оның ішінде көлемі 50 мың 879 гектар болатын 5 жер учаскесі сот шешімімен мәжбүрлі түрде өндірілді. Биыл жыл соңына де­йін облыс бойынша пайдаланылмай жатқан 200 мың гектар жерді қайтару жоспарланған болатын. Бүгінде 69,2 мың гектар жер қайтарылды. Сондықтан бұл жұмыс­тар күшеймесе, бәсеңдемейді, – деді комиссия төрағасы.

Осы жылы комиссия ауылдар ма­ңында­ғы жайылымдық жерлерді қай­таруға баса мән бермек. Соған орай Сырдария және Жалағаш аудандарында «Жер аманаты» жобасының іс­ке асырылу барысы жөнінде аудан әкім­дерінің есептері тыңдалды. Сон­дай-ақ мәселелер талқыға түсті.

Жиында өткен жы­лы мемлекет мен­шігіне қайтарылған ауыл шаруа­шылығы мақсатындағы жер­­­­­­лерді жа­йылымдық жерлерге мұқ­таж елді ме­кен тұрғындарына мақ­сат­ты бөліп беруге арналған монито­ринг картасы­ның жүзеге асуы да пысық­талды.

Е.БЕРКІНБАЕВ

Фото: ашық дереккөзден