Жаңа құрам жұмысын бастады

Сырдария аудандық мәслихатының VIII шақырылымының алғашқы сессия­­сы­­ өтіп, депутаттар мандат алып, қыз­ме­тіне кірісті. Сессияға аудан әкімінің мін­детін атқарушы Б.Сәрменбаев, аудан әкімінің орынбасарлары, құқық қор­ғау органдарының басшы­лары, кент жә­не ауыл әкімдері, мекеме басшылары қатысты.

Жиында аудандық сайлау комиссиясының төрағасы Б.Өтегенова кезектен тыс сайлау қорытындысын жария­лап, бір мандаттық аумақтық округ бойынша сайланған депутаттарға куәлік пен төсбелгі табыс етті.

– Біз үлкен саяси маңызды науқанды жоғары деңгейде қорытындылап, жаңа кезеңге қадам басып жатырмыз. Баршаңызды ҚР Парламенті Мәжілісі мен мәслихаты депутаттары сайлауының қорытындылануымен құттық­таймын. Бұл жолғы сайлау ерекше форматта өтті. Прези­денттің тапсырмасымен заңға нақты өз­ге­­ріс­тер енгізіліп, саяси дода ашық бәсекеге толы форматта өткізілді. Барлық кандидатқа тең құқық пен мүм­кіндік берілді. Нәтижесінде, аудандық мәслихаттың 12 мандатының 11-ін «Amanat» партиясынан, 1-еуін «Ауыл» ха­лықтық-демократиялық патриоттық партиясынан ұсы­ныл­ған азаматтар иеленді, – деді аудандық сайлау комис­сиясының төрағасы.

Сессияда депутаттардың бірауыздан қолдауымен ау­дандық мәслихат төрағасы болып Ержан Әжікенов сайланды. Сондай-ақ «Amanat» партиясының фракция­сы тіркеліп, Е.Жақып жетекшілік ететін болды. Мұнан бөлек аудандық мәслихат жанындағы тұрақты комис­сиялардың атауы мен құрамы бекітілді. Екі комис­сияның біріне Д.Ералиев, екіншісіне А.Есназар төрағалыққа бекітілді.

Аудан әкімінің міндетін атқарушы Б.Сәрменбаев жаңа­дан сайланған депутаттарды құттықтап, алдағы жұмыс­тарына сәттілік тіледі.

– 19 наурыз күнгі сайлаудың жоғары деңгейде өтуі­не үлес қосқан аудандық сайлау комиссиясына, аудан әкімдігіне, кент және ауылдық округі әкімдеріне, мекеме, бөлім басшыларына, жергілікті БАҚ өкілдеріне ал­ғыс айтқым келеді. Біз сайлаудың заңды және ашық демократиялы түрде өткеніне куә болдық. Үгіт-насихат ке­зеңінде де барлық кандидатқа тең мүмкіндік берілді. Соның негізінде сайлауға аудан халқы белсене қатысып, өз таңдауларын жасады. Енді бізді алда үлкен жұмыстар күтіп тұр, – деді Берік Әбдіғаппарұлы.

Сессияда аудандық мәслихат төрағасы Ержан Әжікенов әріп­тестерін құттықтап, бірлесе жұмыс істеуге ша­қырды.

– Біз алдағы уақытта бір жағадан бас, бір жеңнен қол шығарып, ауданымыздың әлеуметтік-экономикалық, қоғамдық-саяси, рухани-мәдени дамуына бар ынта-жіге­рімізбен, күш-қайратымызбен атсалысуымыз қажет. Біз­ден мұны уақыт да, қоғам да талап етіп отыр. Ал бұл істе депутаттық корпус жергілікті атқарушы орган­дармен, аудан әкімдігімен, бөлімдермен, кент және ауыл­дық округі әкімдіктерімен тығыз байланыста болып, ауданымыздың, тұрғындардың игілігі үшін тиімді ше­шімдердің қабылдануына жұмыс істейтін болады. Ау­дандық мәслихаттың жаңа құрамына келетін болсақ, өткен шақырылымдағы депутаттық корпус 50 пайызға жаңартылды. Жаңа есімдер мен жастарға мүмкіндік бе­ріліп, қолдау көрсетілді. Бүгін мандат иеленіп жатқан депутат әріптестеріміз алдағы уақытта мемлекеттік бағ­дарламалардың іске асуына, сондай-ақ партияның және өздерінің сайлауалды бағдарламаларында көрсетілген жоспарлы жұмыстарды, үгіт-насихат кезеңінде сайлау­шылардан түскен өтініштер мен талап-тілектерді орын­дауға жұмыстанады деп сенемін. Бұл ретте депутаттар жергілікті атқарушы органмен, ардагерлермен, қоғамдық кеңеспен, қауымдастық мүшелерімен, үкіметтік емес ұйым­дармен қойын-қолтық жұмыс істеп, тығыз әріптестік байланыста болып, тұрғындар үдесінен шығуы қажет. Ол үшін бізде қалыптасқан жүйе де, бірлік пен өзара іс-қи­мыл алгоритмі де бар. Мәслихат төрағасы ретінде депутаттық корпустың үйлесімді жұмыс істейтініне, бір­лік пен берекелі істердің басы-қасында болатынына, ел­дің мүддесін, облысымыз бен ауданымыздың абыройын бәрінен биік қоя­тынына сенемін, – деп қорытындылады аудандық мәс­лихат төрағасы.

А.ҚҰРМАНАЙТЕГІ