Президенттің алғыс хатын табыстады

Кеше облыс әкімі Нұрлыбек Нәлібаев Сырдария ауданына арнайы келіп, ардагер ұстаз Сұлупан Шамшадиноваға Мемлекет басшысының Алғыс хатын табыс­тады.

Тереңөзек кентінің тұрғы­ны, білім беру саласының ардақты ардагері Сұлупан Шамшадинқызы халықтың қол­­­­­­дауымен Қасым-Жомарт Кемелұлы Тоқаев ел Прези­денті болып сай­лан­ғанда қуа­­ны­шын ашық хат арқылы жет­кізген болатын. Ақ жау­лықты ана өз хатында Мемлекет басшысына жаңа Әділетті Қазақстан құру идеясын іске асыру жолында сәттілік тілеп, Сыр елі жұртшылығының атынан ыстық ықы­ласы мен қолдауын білдірген еді.

«Мен қасиетті Сыр елінде туып-өсіп, киелі Сырдария өзенімен аттас Қызылорда облысы, Сырдария ауданы, Тереңөзек кентінде бүкіл саналы ғұмырым өтуде. 40 жыл ұстаздық еткен абзал ана ретінде «Ұрпағымыздың болашағы қандай болады?» деген сауал үнемі мазалайтын. Елде орын алған дүрбелең, әлемді жайлаған пандемия елді қажытып жібергені рас. Міне, биыл өткен Президент сайлауында ұсынған бағдарламаңыз осынау қиыншылықтардың барлығы артта қалғанына көзімізді жеткізді. Сіз еліміздің болашағын айқындайтын маңызды шешім қабылдадыңыз. Әри­­не, бұл өте дұрыс әрі мезгілінде қа­былданған бағыт-бағдар деп есеп­теймін. Көзі ашық, көкірегі ояу еліміздің бір азаматы ретінде еліміздегі жаңа­лықтардан хабардар болып отырамыз. Әсіресе, аймақтағы жаңалықтар мен туған өлкеміздің даму көрсет­кіштері көңілді қуантады» делінген ашық хатта.

Аймақ басшысы Президенттің ал­ғысына бөленген ұлағатты ұстазды құттықтап, оған белсенді азаматтық ұстанымы мен туған жеріне деген шынайы жанашырлығы үшін риза­шылығын білдірді.

Аудан халқы жақсы біледі, Сұлупан Шамшадинова саналы ғұмы­рын өскелең ұрпақты тәр­бие­­леуге арнады. Ағартушылық қызметін мінсіз атқарумен қатар, қо­ғамдық-саяси жұмыстарға да белсене қа­тысты. Ауылдық кеңес депутаты, аудандық бақылау тобының, «Сыр ана» әжелер ансамбілінің мүшесі болып, өзіне тапсырылған басқа да жұмыстарды абыроймен атқарды. Ардагер зейнет демалысына шықса да ауданның қоғамдық-саяси өміріне бел­сенді атсалысып келеді. Ұстаз есімі «Ай дидарлы аналар», «Сырдария, Сырдария-Тереңөзек», «Сыр өңірінің мәдениеті» атты кітап­тарға еніп, ұзақ жылғы еңбегі мен тәжірибесі өзгелерге үлгі етілді. Ардақты жан сонымен катар өмірлік жары Бақытжан Са­уытбаевпен бірге 54 жыл отасып, бес бала өсіріп, тәрбиелеген. Пер­зенттері жоғарғы білім алып, әрқай­сысы бір-бір отбасы болып, еліміздің дамуына үлес қо­суда.

Ел болашағы – жас ұрпақты оқыту мен тәрбиелеуде елеулі жетістік­терге жеткен, білімін, тәжірибесін, күш-жігерін өскелең ұрпақ игілігіне жұмсаған, аудандағы қоғамдық жұ­мыстарға араласып, белсенділік та­нытқан, туған жердің әлеуметтік-эко­номикалық дамуына ерекше үлес қосқан ардагер-ұстазға «Қазақ ССР халық ағарту ісінің озық қызметкері», «Аға мұғалім» атағы беріліп, бірнеше рет министрліктің, облыс, аудан әкі­мі­нің «Құрмет грамоталары» мен «Алғыс хаттар», «Еңбек ардагері» төс­белгісі табысталған.

Айта кетейік, аймақ басшысы Сыр­дария ауданына жұмыс сапа­ры кезінде Тереңөзек кентіндегі Азат­бақыт Әлиакбаров көшесінде орна­ласқан көпқабатты тұрғын үй аулаларын абаттандыру жұмыс­та­­­­рымен танысып, тұрғындармен пікірлесті. Мұнда аймақ басшысына аудан әкімінің міндетін атқарушы Берік Сәрменбаев атқарылған жұ­мыстар жөнінде ақпараттар ұсынды. Айта кетейік, мердігер мекеме «Аса­нас-Дар» ЖШС өткен жылы жел­тоқсан айында тұрғын үйлер аумағын жөн­деп, қал­пына келтірді. Бұл маң бү­гінде тұрғындар үшін қолайлы ор­таға айналды.

Мұнан бөлек, облыс әкімі аудан орталығындағы «Углесбыт» серік­тестігінің кү­ріш ақтау зауытының жұ­мысын көр­ді. Серіктестік басшысы Фархат Расулұлы кәсіпорынның тәу­­­лігіне 100 тонна күріш өндеуге қау­қарлы екенін айтып, мұнда 30 адам жұмыспен қамтылғанын жеткізді. Өңір басшысы кәсіпкердің ел игілігі үшін атқарып жатқан жұмысына сәт­тілік тіледі.

«ТТ» ақпарат