Еңбеккерлер еңбегі еленді

Ақиық ақын туған Асқар ауылында еңбеккерлердің маңдай тер еңбектері еленді. Ерте көктемнен алтын күзге дейін жұмыстың көрігін қыздырған «Берекет» шаруа қожа­лығының қызметкерлеріне салтанатты іс-шара ұйымдастырылып, қажырлы еңбек­теріне лайықты құрмет көрсетілді. Еңбек адамдары мерейге бөленген іс-шараға аудан әкімінің орынбасары Талғат Нұртазаев, «Берекет» шаруа қожалығының төрағасы Азамат Сқақов және ауыл тұрғындары мен шаруашылық еңбеккерлері қатысты.

Салтанатты іс-шарада аудан әкімінің орынбасары Т.Нұртазаев сөз сөйлеп, егінжай ерлерін қандай қиындық болса да берекелі жылды табысты қорытын­ды­лағандарымен құттықтады.

– Іргелі аудан өткен жылы «Үздік аудан» атанды. Бұл барлық көрсеткіш бо­йынша ауданда жұмыс қарқыны жоғары екенін көрсетті. Оның ішінде ауыл ша­руашылығы саласында аудан жыл са­йын зор табысқа жетіп келеді. Оған осы өңірдегі барлық шаруашылық құрылымдарының қосып келе жатқан үлесі бар. «Берекет» шаруа қожалығының еңбеккерлері де ала жаздай адал еңбек етіп, ел қамбасын алтын дәнге толтырды. Соның нәтижесінде ел несібесі молайды, еңбеккерлердің берекесі артты. Сондықтан егінжай ерлеріне құрметіміз ерекше. Шаруа қожалық жұмысына табыс тілеймін, – деді Талғат Мейрамханұлы.

«Берекет» шаруа қожалығының тө­ра­­ғасы А.Сқақов та егін науқанында уа­­қытпен санаспай, бірлесе еңбек еткен шаруашылық қызметкерлеріне алғы­с айтты. Шаруашылық төрағасы өт­кен жылғы егін науқанында 300 гектар жерге Сыр дақылы егіліп, одан мол өнім алынғанын атап көрсетті. Бұл жұмыс­тардың барлығы еңбеккерлердің қа­жыр­лы жұмысы екенін айтып, биыл да ел қам­басын астыққа толтыру бағытында нақты жұмыстар атқарылатынын жеткізді.

Құттықтаудан кейін еңбек озаттары арнайы «Алғыспен» марапатталды. Олардың қатарында Дінислам Айтбайұлы, Арыстан Бегманов, Ертуған Жаңабаев, Нұртаза Сейтбай, Бекзат Төреханов, Бекзат Қошқаров, Олжас Маханбетов, Алмас Жәркеев, Ғабдолла Қалдығараев, Руслан Жылқыбаев, Жәнібек Жылқыбаев, Серікбол Сыздықов, Мұрат Донбаев, Дулат Жарасбаевтар арнайы марапатта­лып, оларға бағалы сыйлықтар берілді. Ал шаруашылықтың озат механизаторы Жақсыбай Жарасбаев қажырлы еңбегі үшін автокөлік мінді.

Іс-шарада еңбек ардагерлері Көпбол­сын Жақып және Роза Төлепова сөз сөйлеп, жыл қорытындысымен озат атан­ған еңбек адамдарын құттықтап, жұ­­мыс­та­рына табыс тіледі. Сондай-ақ ел несібесінің артуына әркез тілекші екендік­те­рін жет­кізді.

Еңбеккерлердің мерейлі шағында эстра­да жұлдыздары, Сыр өңіріне белгілі әншілер Үкітай Ерниязов пен Әл-Фараби Бекарысұлы және жас әнші Гүлнұр Басымбаева әннен шашу шашты. Ала жаздай тынымсыз еңбек еткен шаруа адамдарының көңіл-күйін көтеріп, мереке думанға ұласты.

Ердос СӘРСЕНБЕКҰЛЫ