«Самара-Шымкент-Тереңөзек» автожолы жөнделеді

Газетіміздің 14 қаңтар күні жарыққа шыққан №4 санында биыл аудан бо­йын­ша автомобиль жолда­рына барлығы 27,6 ша­қырым ас­фальт жабынды­лары тө­селіп, орташа жөн­деу жұ­мыс­тары жүр­­гі­зі­летінін жаз­ған едік. Оның ішінде, ау­дан ор­та­лығы мен елді ме­кен­­дердегі жолдар осы жылы жақсаратынын атап көрсеттік. Бұдан бөлек, би­ыл облыстық маңызы бар «Самара-Шымкент-Те­­­рең­­­өзек» жолы да жөн­­­делетін болады. Бұл – тұрғындар үшін жақсы жаңалық.

«Самара-Шымкент-Тереңөзек» автожолы деп отырғанымыз – дарияның солтүстігіндегі ауылдарды аудан орталығымен байланыс­тыратын жол. Шаған мен Тереңөзек арасы болған соң көпшілік мұны «Шаған жолы» деп те атап кеткен. Сырдария өзеніне ғасыр құрылысы саналған көпір түскен соң бұл жолмен Тереңөзекке келетіндер, одан бөлек бас­қа аудандардан қатынайтындар қатарында шек жоқ. Сондықтан бұл автожол облыстық маңызға ие.

Негізінен, бұрыннан төселген асфальт жабындысы 5-6 жыл бұрын қайта жөнделген еді. Дегенмен жол бойында күріштік атыз болып, онда жаз бойы судың болуы жолға айтарлықтай кері әсерін тигізуде. Одан бөлек, маусымдық кезеңдерде ауыр техникалардың жиі қатынауы жол сапасын төмендеткен. Қа­зіргі таңда осы жолдың орта тұсы ойдым-ойдым болып, автокөліктер жүрісіне кедергі болуда.

Аталған автожолға байланысты аудан әкімі Мұрат Ергешбаевтың бастамасымен ұсыныс беріліп, аймақ басшысының қолдауы­мен биылға қаржы мәселесі шешімін тапты.

– Облыстық маңызы бар «Самара-Шым­кент-Тереңөзек» автомобиль жолының 0-12 шақырым бөлігіне орташа жөндеу жұмыс­тары осы жылы жүргізіледі. Бұған респуб­ликалық бюджеттен 687,6 млн теңге қаржы бөлінді. Жолды жөндеуге тапсырыс беруші – Қызылорда облысының жолаушылар көлігі және автомобиль жолдары басқармасы. Қа­зіргі таңда жөндеу жұмыстарын жүргізетін мердігер мекеме анықталып қойды. Соған байланысты жол құрылысы жұмыстары биылғы мамыр айында басталады деп жоспарлануда, – дейді аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің мамандары.

Жалпы, техникалық сипаттамасына сәйкес, жолдың қатты бұзылған бөліктерінің топырағы ауыстырылады және жаңадан жол жабындылары төселмек. Жөнделетін жолдың ұзындығы 12 шақырымды қамтыса, ені 7 метр болады. Міне, осы сипаттама негізінде екі аралықтағы жол сапалы қайта жөндеуден өтсе, барлығы үшін қолайлы болмақ. Халықтың да тілегі сол – тегіс жолда кедергі болмаса игі.

Е.БЕРКІНБАЕВ