Тұрғындар мәселесін тыңдады

Мемлекет басшысының «Әкім­дер­­­­дің халықпен кездесулерін өт­кі­­зу туралы» Жарлығы аясында­ об­лыс­ әкімі Нұрлыбек Нәлібаев құ­қық­ қорғау органдарының бірін­ші­­ басшыларымен бірге аудан тұр­ғын­­дарына жеке қабылдау өткізді. Те­рең­өзек кенті мәдениет үйінде ашықтық қағидасына негізделген қа­был­дауда барлығы 84 азаматтың өті­­ніші қаралды.

Аймақ басшысына 38 тұрғын өз сұрағымен келіп, өздерінің мәселелерін жеткізді. Жергілікті азаматтар тұрғын үй алу, жұмысқа орналасу, инфра­­құрылым жүргізу және басқа да мәселелерін көтеріп, әлеуметтік аз қамтылған отбасылар түрлі көмектер алудың жолдарын сұрады.

Қабылдау аясында өңір басшысы Шаған және Нағи Ілиясов ауылының шаруалары арасындағы жер үлесі мә­селелерін тыңдап, екі тараптың уәждеріне құлақ асты. Бұған қатысты мәселелер сала мамандарымен бірге мұ­қият зерделеніп, заңдылыққа байланыс­ты шешім қа­былданатынын жеткізген аймақ басшысы жауап­ты бас­қарма басшыларына нақты тапсырма берді.

Әрбір тұрғынның мәселесіне қатысты құқық қорғау органдарының басшылары да заңдылықтарға сай түсін­дірме жүргізді. Тиісінше, тұрғындар өздерінің мәсе­лелері шешім табатынына сенім білдірді.

– Бүгін ауданымызға келген облыс әкімі мен барлық құқық қорғау орган басшыларына мәселелерімізді тө­тесінен қоюға мүмкіндік алдық. Мен Қоғалыкөл ауылы мен Қызылорда қаласы арасындағы жол сапасы мә­селесін көтерген едім. Аймақ басшысы аудан әкіміне тиісті тапсырма берді, мәселемнің маңызды екенін алға тартты. Ендігіде жол сапасын жақсартуға арнайы жоба дайындалып, бұл мәселе шешімін табатын болды, – дей­ді аудан тұрғыны Д.Қырдан.

Сондай-ақ А.Жүсіпова көпшілікті қоғамдық көлік мә­селесі алаң­­датып отырғанын атап, ауылдық округтерге қа­тынайтын қоғамдық көлік жүргізуге ықпал жасау­ды сұрады. Бұған қатысты аймақ басшысы нақты жұмыстар жүргізілетінін жеткізді. Қабылдау барысында құқық қор­ғау органдарының басшыларына 46 азамат өз мәселесін жеткізіп, заң аясында тиісті түсіндірме алды.

Жеке қабылдаудан кейін облыс әкімі Н.Нәлібаев ау­дандық мәдениет үйінде Президент Жарлығы аясында тұрғындармен кездесті. Кездесуде аймақ басшысы өңір­ді өркендетудегі жарқын істерге тоқталды.

– Мемлекет басшысының қолдауының арқасында Сыр елінде нәтижелі жұмыстар атқарылып жатыр. Облысқа әкім болып келгенде аяқ су тапшылығына бай­ланысты егістік жерлерді қысқарту көзделген екен. Президенттің қолдауымен біз ол жерлерді қысқартқан жоқпыз. Се­бебі, Сыр жұртшылығы ата кәсіппен күн көріп отыр. Мемлекетаралық деңгейде келіссөздер жүргізіліп, егінге су жеткізілді, өнім мол, диқандар мерейі үстем болды. Бүгінде өңір дамуына Мемлекет басшысы зор көңіл бөлуде. Соған орай облыс орталығында ауқымды жобалар жүзеге асырылуда. Атап айтқанда, жылу электр станциясы, мәдениет орталығы, неке сарайы, қан орталығы, 300 орындық аурухана мен 100 орындық емхана бой көтермек. Сондай-ақ, жеке кәсіпкерлердің демеушілігімен әуежай терминалы, «Аналар үйі» салынатын болады. Мұндай ауқымды жобалармен қатар біз халыққа бірінші кезекте қажетті электр жарығы, жол, су секілді өзекті мәселелердің шешімін табуына жұ­мыс жасап келеміз. Осы ретте, біз үнемі халықпен кез­десіп, жеке қабылдауларды тұрақты ұйымдастырып, мә­селелерді шешетін боламыз, – деді Н.Нәлібаев.

Кездесу барысында еңбек ардагерлері Жарылқасын Камалов пен Алмагүл Бақтиярова сөз сөйлеп, ел үшін ат­қарып жатқан жұмыстарға алғысын айтып, жаңа жо­балардың жүзеге асуына сәттілік тіледі. Тыл және еңбек ардагері Рақымжан Бәйменов ақ батасын берді.

Е.БЕРКІНБАЕВ