Мүмкіндігі шектеулі жандарға еш кедергі болмауы тиіс

Мүмкіндігі шектеулі жандарға кедергісіз орта болу қажет. Бұған мемлекет тарапынан қолдау көп. Соның ішін­де олардың кез келген ғимаратқа еркін кіріп-шығуына да жағдай жасалуы тиіс. Атап айтқанда, ғимарат алдына келгеннен бастап арнайы автотұрақ, пандус, оларды қабыл­дайтын орын тиісті талаптарға сай болуы керек. Осы мақ­сат­та құрылған мониторингтік топ пандустарға қатысты зер­делеу жұмыстарын жүргізді.

«Кедергісіз келешек» жобасы аясында мүмкіндігі шектеулі жандарға қолайлы ортаның дұрыс қалып­тасуын мақсат еткен топ құрамына «AMANAT» партия­­сы, әлеуметтік, құрылыс, экономика, мәдениет, БАҚ саласы және ҮЕҰ өкілдері енгізілді. Олар Тереңөзек кенті мен ауылдардағы әлеуметтік нысандарды аралап, пандустарды стандартқа сәйкестендіру бойынша түсіндірмелер жасады.

Мониторинг барысында автотұрақ белгісі болуы, пандустың бекітілген талапқа сәйкес жасалуы, есіктерге арналған сары түсті жапсырмалар, так­тильді жолақ, тактильді полиуретанды плитка, мекеме туралы ақпараттық белгілер, брайль әріптерімен жазылған ақпараттық тақталар, жуынатын және дә­ретхана бөлмелерінде тіреуішті тұғырлардың болуына қатысты талаптар зерделенді. Бұл талаптар көбіне елді мекендердегі мәдениет үйлері мен мектептерде сақталған. Өйткені бұл мекемелерде сайлау өтеді. Десе де кейбір мәдениет мекемелері мен білім ордаларының пандустары мүмкіндігі шектеулі жандарға үлкен кедергі келтіреді. Арбаға таңылған жандар ол мекемелерге бара қалса, ішіне кіріп-шы­ғудың өзі мұң болары анық.

Басқа мекемелерде де сын-ескертпелер бар. Бірен-саран ескертпелер қалпына келтірілсе, мүмкіндігі шектеулі жандарға қызмет көрсеткенде еш кедергі бол­майтын әлеуметтік нысандар да жетерлік.

Мониторингтік топ мүшелері мүмкіндігі шектеулі жандарға қолайлы орта қалыптастыруға қатысты ескерт­пелерді тисті мерзімінде қалыпқа келтіруді ескертті. Ал ескертулер қалпына келтірілмесе, «Қа­зақстан Республикасында мүгедектерді әлеуметтік қор­ғау туралы» Заңның 25 бабына сәйкес «Лауазымды адамдардың, сондай-ақ кәсіпкерлік қызметті жүзеге асыратын жеке тұлғалардың мүгедектердің әлеуметтік инфрақұрылымға және көліктік инфрақұрылымына ке­дергісіз қол жеткізуі үшін жағдайларды қамтамасыз етпеуі ҚР Әкімшілік құқық бұзушылық туралы ко­дексіне сәйкес, әкімшілік жауаптылыққа әкеліп со­ғады». Сол себепті де әрбір мекеме қызметкерлері кедергісіз орта қалыптастырудың жауапкершілігін се­зінуі қажет.

Ердос БЕРКІНБАЕВ