Саламатты өмір – денсаулық кепілі

1948 жылы 7 сәуір күні Дүниежүзілік денсаулық сақтау ұйымы құрылды. Сол күннен бастап атау­лы күнді дүниежүзінің осы ұйымға мүше елдері денсаулық күні ретінде атап өтеді.

Жыл сайын денсаулық күнін өткізу 1950 жылдан бастап дәстүрге айналды. Жалпы әрбір адам үнемі денсаулықты жақсартуға мән беріп, оның маңызы, ау­рудың алдын алу туралы білуі тиіс. Халық даналығындағы «ауырып ем іздегенше, ауырмаудың жолын ізде» деген сөздің мағынасы адам өміріндегі денсаулықтың қаншалықты маңызды екенін меңзесе ке­рек.

Шын мәнінде адамның денсаулығы медицинаға байланысты емес екені дә­лелденген. Нақтырақ айтқанда, денсау­лық сақтау деңгей­інің 8-10 пайызы ғана медици­налық қызмет көрсетуіне қа­тысты екені анық­талған. Яғни адамның денсаулығы саламатты өмір салтын ұс­танумен, дұрыс тамақтану, әлеуметтік жағ­дайы және тұқым қуалаушылықтан қа­лыптасады.

– Елімізде денсаулық сақтау саласы күн сайын дамып келеді. Аудандық аурухана мен емхананың мүмкіндігі де артуда. Қажетті медициналық құ­рыл­ғылармен қамтамасыз етуге, жеткілікті деңгейде дәрі-дәрмектің болуы мемлекет тарапынан үлкен мән берілуде. Тұр­ғындарды уақытылы меди­циналық тексеруден өткізуге мамандар ғана жа­­уапты деген қате түсінік болмауы керек. Әрбір адам жылына бір рет флю­оро­графиялық тексеруден өтіп, учас­келік дәрігердің қабылдауында болу­­ға міндетті. Саламатты өмір салтын наси­­хаттау, ана мен бала денсаулығы мемлекеттік деңгейде жүргізіледі. Дегенмен қазіргі уақытта халық арасында спорттың денсаулыққа әсері туралы көп айтылуда. Тұрақты түрде спортпен айналысу, дұрыс тамақтану пайдалы әрі ұзақ өмір сүрудің кепілі екенін маман ретінде айтқым келеді. Ойыңыз сергек, деніңіз сау болуы өмір салтыңызға, зиянды әдеттерден бойыңызды аулақ ұстауымен тығыз байланысты, – дейді ау­дандық аурухана бас дәрігерінің орын­басары Ж.Жұмабаева.

Соңғы жылдары әлемді дендеген пан­демия салдары көп елді әбігерге сал­ды. Қаншама адам аурудың құрбаны бол­ды. Денсаулық сақтау саласының әле­уеті пандемиямен күресте қанша­лықты екенін көрсетті. Жұқпалы індет­пен күресте вакцинаның тиімділігі дә­­лел­­денді. Жаппай вакциналаудың ар­қа­­­­сында дертті жеңуге мүмкін болды. Де­генмен медицина мамандары саламатты өмір салтын насихаттаумен қатар жергілікті емханаға келіп, тексеріліп тұ­рудың қаншалықты маңызды екенін айтады.

– Уақытылы жүргізілетін тексеру аса ауыр ауруды ерте кезде анықтауға және емдеуге көмектеседі. Мәселен, елімізде Әлеуметтік медициналық сақтандыру қо­­ры жыл сайын профилактикалық тек­­­­серуге қаржы бөледі. Скринингтік тек­се­­­руді уақытында өту – белгілі бір жас­тағы адамдардың ауруын ерте сатыда анықтауға мүмкіндік беретін меди­циналық тексеру. Арнайы тексеру әді­сімен емханада жүргізілетін скрининг әсіресе, қатерлі ісікті және тағы басқа аурудың болуын алдын алып, дерттің пайда болу ықтималдығын анықтайды. МӘМС бойынша көрсетілетін қарап-тексеру учаскелік дәрігердің қабыл­да­уына барумен іске асады, – дейді учаскелік дәрігер А.Қозбағарова.

Дүниежүзілік денсаулық күні ақ халатты абзал жандар саламатты өмір сал­тын насихаттап, бұқара халықты спортпен шұғылдануға, уақытылы меди­ци­налық тексеруден өтуге шақырады.

Бибісара ЖАНӘЛІ