Әрбір дерек мұқият тексеріледі

Орталық коммуникациялар қыз­ме­тін­­де ҚР Бас прокура­ту­расының қыл­мыс­­тық қудалау қызметінің бастығы Се­рік Шала­баев брифинг өткізді. Бас­па­сөз мәслихатында ол қайғылы қаңтар жағдайының хроноло­гиясына тоқ­та­лып, тергеу жұ­мыстары бары­сындағы ақпа­рат­­­­тарды мәлімдеді.

Бас прокуратура өкілі бүгінде Мемлекет басшысының тапсырмасына сәйкес Алматы қаласында және басқа өңірлердегі террористік шабуылдардың барлық се­беп­тері мен егжей-тегжейін анықтау мақса­тында тергеу жүргізуде екенін жеткізді. Ол қазірдің өзінде барлық аталған оқиғалар бір тізбектің буындары және террористердің әрекеттері бір орталықтан басқарылған деп айтуға болатынын атады. Сондай-ақ, құқық қорғау органдары террористік актілерге қатысушыларды анықтау және жазалау, ел­дегі қоғамдық қауіпсіздікті толық қалпына келтіру бойынша барлық қажетті шараларды қабылдауда екеніне нақты тоқталды.

– Адам шығыны болған оқиғаларды тер­геп-тексеруге ерекше назар аударылуда. Бү­гінгі күні 4578 жәбірленуші анықталды, оның 4353-і жараланды, оның ішінде 3393 құқық қорғау органдарының қызметкерлері. Төтенше жағдай кезінде мәйітханаларға қаза тапқан 225 адам жеткізілді. Олардың бір бөлігі – терактілерге қатысқан, ғимараттар мен құқық қорғау қызметкерлеріне ша­буыл жасаған қарулы бандиттер. Қаза бол­ғандардың ішінде 19 полиция және әс­кер қызметкерлері бар. Өкінішке қарай, бейбіт тұрғындар да терроризм актілерінің құрбаны болды. Біз азаматтарымыздың, сон­дай-ақ Қарулы экстремистердің құрбаны бол­ған­дардың қауіпсіздігі мен өмірін қорғап, қаза тапқандардың туған-туыстары мен жа­қын­дарына тағы да көңіл айтамыз. Бұл алдын ала деректер, олар нақтыланып жатыр және өзгеруі мүмкін. Дегенмен, әрбір факті мұқият тексеріледі. Нәтижесі бойынша құқықтық баға беріледі, – деді С.Шалабаев.

Сонымен қатар, спикер бүгінгі таңда тергеу-жедел топтары 546 қылмыстық істе тергеу жұмыстарын жүргізіп жатқанын айт­ты. Олардың ішінде 44-і – терроризм актісіне, 34-і – жаппай тәртіпсіздікке, 15-і – адам өлтіру бойынша және тағы басқа қыл­мыстарға қатысты. Ал уақытша ұстау изо­ляторына қылмыс жасады деген 672 кү­дікті ұсталған, оның 446-сы соттың санкция­сымен қамауға алыныпты. Құжаттарды тексергеннен кейін және ұстауға негіз бол­ма­ғандықтан прокуратура органдары 100-ден астам азаматты босатқан.

Брифинг барысында қасіретті қаңтар жағ­дайындағы ақпараттарды мәлімдеген Бас прокуратура өкілі уақытша шектеулерге түсіністікпен қарауға, қоғамдық тәртіпті сақ­тауға, жалған ақпаратқа сенбей, тек ресми ақпарат көздеріне сенуге шақырды. Сонымен қатар, егер азаматтар өз құқықтары бұзылды деп есептесе, Бас прокуратураға 115 нөмірі бойынша немесе тікелей аумақ­тық прокуратураларға хабарласа алатынын жеткізді.

Ердос БЕРКІНБАЕВ