Роза Бағланова 100: Музыкалық челлендж басталды
Роза Бағланова 1922 жылы 1 қаңтар күні дүниеге келген. Қазақтың бұлбұл әншісі Роза Бағланованың 100 жылдығына орай #РозаБағланова100 жыл челленджін басталды. Жаңа 2022 жыл күнтізбесінің алғашқы парағын қазақтың бұлбұл әншісі Роза Бағланованың 100 жылдық мерейтойы ашады.
Сондай-ақ ҚР Президенті Қасым-Жомарт Тоқаев Роза Бағланованың туғанына 100 жыл толуына орай Twitter-парақшасында жазба қалдырды.
«Бүгін қазақтың күміс көмей, бұлбұл әншісі Роза Бағланованың туғанына 100 жыл толды. Ол КСРО халық әртісі, сондай-ақ Қазақстанның «Халық Қаһарманы» атағына да ие болды», – деп жазды Мемлекет басшысы.
Қазақстанның және КСРО-ның халық әртісі, Халық қаһарманы Роза Бағланова 1922 жылы 1 қаңтар күні дүниеге келген. Бар ғұмырын қазақ өнерінің өркендеуіне арнаған Роза Тәжібайқызы жарты ғасырдан астам уақыт бойы «Қазақконцерт» ұйымында еңбек еткен.
Осыған орай Роза Бағлановамен әріптес болып, тәлімін алған Қазақконцерт әншілері алғашқылардың бірі болып, #РозаБағланова100жыл музыкалық челлендж ұсынды.
Әлеуметтік желіде таралып жатқан жаңа челленджді Қазақстанның халық әртісі Роза Рымбаева бастады. Ол барша қазақстандықтарды құттықтап, эстафетаны «Бұлбұл» сериалында Роза Бағланованың образын шебер сомдаған жас актриса, «Астана мюзикл» театрының әртісі Зарина Жакеноваға жолдады.
Еске салсақ, өткен жылы 24 қарашада ЮНЕСКО-ның (БҰҰ Білім, ғылым және мәдениет жөніндегі ұйымы) 2022-2023 жылдарға арналған халықаралық мерейтойлар тізімі қабылданып, оған Қазақстанның ұсынысымен Ахмет Байтұрсынұлының 150 жылдығы мен Роза Бағланованың 100 жылдығы енді. Осылайша, Қазақстанның қос тұлғасының мерейтойлары ЮНЕСКО көлемінде аталып өтпек.
