83 пәтер пайдалануға беріледі

Сырдария ауданында Жыл соңына дейін 83 баспана пайдалануға беріледі. Сырдария­лық тұрғындар ел Тә­уелсіздігінің 30 жылдық ме­рейлі мерекесінде қоныс тойын тойлаудан үміт­ті.

«Нұрлы жер» мемлекеттік бағдар­ламасы аясында салынған баспаналар тұрғын үй кезе­гінде тұрған көпбалалы отбасыларға бе­ріледі деп күтілуде. Қазіргі таңда 10 үйдің құрылысы толықтай аяқталған. 4 бөлмелі жер үйдің құжаттары рәсімделу үстінде. Заманға сай жабдықталған үйлерде бар­лық жағ­дай жасалған. Алдағы уақытта да жа­ңа баспаналардың құрылысы ауданда қар­қын алып, қарапайым халықтың тұр­ғын­ үй мәселесі кезекпен шешілетін болады.

– Бүгінде ауданымызда құрылыс жұ­мыс­тары жандану үстінде. Осы кезге дейін үй кезегіне 600-ден аса адам тіркелген. Көпбалалы отбасыларды баспанамен қам­тамасыз ету басты мақсатымыз болып табылады. Аудандағы әрбір отбасы жайлы баспанаға қол жеткізіп, қоғам өмірімен біте қайнасуын көздейміз. Жыл басынан бері республикалық бюджеттен 11 елді ме­­кенде 33 тұрғын үй салынуда, – дейді аудан әкімі Мұрат Ергешбаев.

Жақында жаңадан салынған баспанаға қол жеткізетін тереңөзектік Гүлжазира Едренова – көпбалалы ана. Ол осы уа­қытқа дейін пәтер жалдап тұрған. Енді мұндай қиын сәттер артта қалатынына дән риза.

– Мен осыдан 8 жыл бұрын үй кезегіне тіркелген болатынмын. 7 баланың анасымын. «Нұрлы жер» бағдарламасы аясында тұрғын үйге қол жеткізгеніміз үшін қуаныштымыз. Осы кезге дейін көрген қиындығымыз көз алдымызда. Пәтер жаға­лап, балаларды жеткізіп келеміз. Өзіміздің үйіміз болғанын жақсылыққа балап отырмыз. Берекелі шаңырақта ұрпақ өрбітіп, бақытты ғұмыр кешсек дейміз, – дейді көп­балалы ана.

Айта кетейік, тұрғын үй салу үшін бо­лашақта жергілікті халыққа 135 гектар жер телімі берілмек. Берілетін жер теліміне 3 жыл ішінде құрылыс жұмыстары жүргізілуі тиіс.

Балтабай ОРДАБЕКОВ