Облыстық іс-шара жоспары бекітілді
Қызылорда облысында Қазақстан халқы тілдерінің күні мерекесін атап өтудің облыстық іс-шара жоспары бекітілді.Өңірде 5 қыркүйек - Қазақстан халқы тілдерінің күні мерекесін атап өтудің облыстық іс-шаралар жоспары бекітілді. Тілдер күніне арналған түрлі шаралар, тіл жанашырларын марапаттаулар карантин талаптарын сақтай отырып, ұйымдастырылады. Облыстағы жоғары және арнаулы орта оқу орындары мен жалпы орта білім беретін барлық мектептерде, мектепке дейінгі мекемелерде тілдер күніне орай ашық сабақтар, сайыстар өткізіліп, кітапханаларда «Туған тілім - тірлігімнің айғағы», «Тіл - асыл қазына» тақырыптарында онлайн кітап көрмелері көпшілік назарына ұсынылады. «Мерекеге орай Қызылорда қаласы мен аудандарда оқиғалар тізбесі қалыптастырылды. Атап айтсақ, Қызылорда қаласында «Тілім – тірегім», Қызылорда – жүрегім» атты облыстық жазба ақындар мүшәйрасы мен көркемсөз оқу шеберлерінің қалалық байқауы болады. Ал Арал ауданында «Тіл – татулық пен достықтың тірегі» атты аудандық онлайн мүшәйрасы және «Ана тілім – мәңгілік бой тұмарым» байқауы, Қазалы ауданында «Ахмет Байтұрсынұлы – қазақ тіл білімінің негізін қалаушы» ғылыми-танымдық конференциясы мен «Туған тілім – мөлдіреген тұнығым» тақырыбында онлайн жыр кеші өткізіледі. Сондай-ақ, Қармақшы ауданында «Туған тілім – тірлігімнің айғағы» атты жазба ақындар мүшәйрасы, Жалағаш ауданында «Алаш зиялылары және қазақ тілі» тақырыбында дөңгелек үстел, «Латын әліпбиі – ұлт болашағының негізі» онлайн конференциясы, Сырдария ауданында «Тіл – татулық тірегі» аудандық фестиваль болады. Шиелі ауданында «Тілім менің ғасырларға аманат» үздік мақалалар байқауы, Жаңақорған ауданында «Менің тілім – мәңгілік тіл» жазба ақындар мүшәйрасы және тағы басқа шаралар өткізіледі», - деді облыстық ішкі саясат басқармасы басшысы Мира Қазбекова мәлімдеді.. Жалпы, мемлекеттік тілдің қолданыс аясын кеңейту бағытындағы шаралар өңірде тек қана тілдер мерекесі қарсаңында ғана емес, жыл бойы жүргізіледі.
