Алаяқта айла көп
Былтырмен салыстырғанда осы жылы Қызылордада қылмыс түрлерінің азайғаны анық байқалады. Дегенмен де полицейлер алаяқтық жасап, жұртты алдағандардың жиілеп кеткенін айтып отыр.Өзіне сенген жұрттың қалтасын қағуды ойлайтындар әдіс-айлаларын да «жетілдіріп» алған. Олардың қатарында қыз-келіншектердің көптігіне де көз үйреніп барады.
Облыс орталығынан жаңа пәтер алуды жоспарлап жүрген қала тұрғыны осы жылдың тамыз айында осындай бір алаяқтың арбауына түсіпті. «Жаңа ауданнан жайлы пәтер алуға, оның құжаттарын рәсімдеуге көмектесемін» деген әйелдің сөзіне шүбәсіз сенген тұрғын оған 3 млн теңгені шытырлатып санап берген. Көп ұзамай көңіліне күдік кіріп, берген ақшасын қайта сұрапты. Алаяқ әйел алғанының 1 млн теңгесін ғана қайтарып, қалғанын кейін бермекке уәде етеді. Кесімді мерзім ұзап бара жатқан соң алданғанын анық сезген тұрғын 27 қарашада Қызылорда қалалық полиция басқармасына алаяқтық дерегіне қатысты арыз түсіріпті.
Қызылорда қалалық Полиция басқармасы қызметкерлері жүргізген жедел-іздестіру шараларының нәтижесінде облыс орталығының 57 жастағы тұрғыны ұсталды. Өзіне қатысты ешқайда кетпеу және өзін дұрыс ұстау туралы қолхат түрінде бұлтартпау шарасы қолданылған күдікті жасаған іс-әрекетін толық мойындап отыр.
Қазір алаяқ әйелдің үстінен Қылмыстық кодекстің 190-бабының 1-бөлігі бойынша сотқа дейінгі тергеп-тексеру жүргізілуде.
