Президент 2021 жылды Тәуелсіздіктің 30 жылдығы жылы деп жариялады
Мерейтой саяси-экономикалық реформалар, цифрландыру, балалар мен мүгедектердің құқығын қорғау, экология мәселесін шешу аясында өтедіПрезидент Қасым-Жомарт Тоқаев 2021 жылды Тәуелсіздіктің 30 жылдығы жылы деп жариялады, деп хабарлайды sputnik.kz
"Ұлттық қоғамдық сенім кеңесінің IV отырысында 2021 жылды Тәуелсіздіктің 30 жылдығы деп жариялау туралы шешімімді айттым. Бұл өткен жолымызды зерделеуге жақсы мүмкіндік", - деп жазды президент Twitter парақшасында.
Ол мерейтой саяси-экономикалық реформалар, цифрландыру, балалар мен мүгедектердің құқығын қорғау, экология мәселесін шешу аясында өтетінін хабарлады.
"Біз оқу сауаттылығы деңгейін арттыруға баса мән беруіміз қажет. Бұл бағытта жаңғыртуды және цифрландыруды қажет ететін кітапханалар маңызды рөл атқарады", - деді президент.
Бұған дейін мемлекет басшысы мерейтойды сан алуан салтанатты жиындармен атап өтетін уақыт емес екенін айтқан болатын. Бұл дата саяси және экономикалық реформалар, цифрландыру, адам құқықтарын қорғау, білім мен денсаулық саласын дамыту, экологияны қорғау сияқты шаралармен есте қалуы керек. Сондықтан біз қысқа уақыттың ішінде нақты нәтижеге жетуіміз керек, деді президент.
