Тіршілік тынысы Tirshilik-tynysy.kz ақпараттық агенттігі
» » Іс-шаралар онлайн форматта өтуде

Іс-шаралар онлайн форматта өтуде

Атақты Уинстон Черчилльге 1943 жылы бюджетті бекітуге алып келгенде, ол маңызды құжатта мәдениет саласына қаржы бөлінбегенін байқайды. Оның себебін сұрағанда, «соғыс жүріп жатқанда мәдениетке ақша бөлудің қажеті қанша» деген уәжді естиді. Сонда Черчилль «Мәдениетті ұмытсақ, несіне соғысып жатырмыз» деп бюджетке қол қоймай жіберіпті.

Мәдениеті өскен ел – өркениетке көшкен ел. Халқымызда «Мәдениет – мәңгілік, өнер – өміршең» деген тағылымды сөз бар. Мәдениет саласын дамыту, өнерлі азаматтарға қолдау көрсету еліміз егемендік алған алғашқы жылдардан бастап жүргізіліп келеді. Бұл бағытта ауыз толтырып айтарлықтай ауқымды жетістіктеріміз де бар. Осы ретте қазақ өнері мен мәдениетінде Сыр өңірінің алатын орны ерекше екенін атап өтуіміз қажет.

Сатира сардары Асқар Тоқмағам­бетов, қағытпа сөздің қара нары Қалтай Мұхамеджанов, театр анасы Сәбира Майқанова секілді дарынды тұлғалар туып өскен Сырдария ауданының қасиетті топырағынан елімізге ғана емес, әлемге танылған көптеген таланттар түлеп ұшты. Олардың бүгінгі ізбасарлары да осал емес. Халыққа рухани мол қазына сыйлап, айналасын думанға бөлеп жүретін сахна саңлақтары алдыңғы буынның өрісті де келісті ісін бүгінде лайықты жалғастыруда. Бұл сөзімізге төтенше жағдай ке­зеңінде де карантин талаптарына сәйкес халыққа мәдени қызметін ұсынып жатқан сала мамандарының жүйелі жұмысы дәлел бола алады.

Әлеуметтік желінің әлеуеті арт­қан кезеңде аудандық мәдениет және тілдерді дамыту бөлімі мен аудандық мәдениет үйі «Фейсбук» әлеуметтік желісінен мекеменің ресми парақшасын ашып, жұмыс жүргізе бастады. Ресми парақша арқылы алғашында хабарландыру, құттықтау және аудан өнерпаз­дарының жетістіктері жария етілсе, уақыт өте келе бұл бағытта жұмыс­тар жетілдірілді. Қазіргі таңда атаулы мерекеге орай ұйымдастырылған іс-шаралар мен концерттік бағдар­ламалар халық назарына онлайн форматта ұсынылуда. Бір сөзбен айтқанда, ел-жұрт үйде отырып-ақ аудан өнерпаздарының концертін тамашалай алады. Тек қолыңызда ғаламторға қосылған ұялы телефо­ныңыз болса жеткілікті.

– Әріге бармай-ақ соңғы екі ай көлемінде атқарылған жұмыстарға тоқталсақ. Мамыражай мамыр – ме­рекелерге толы ай. Мамыр айы­­ның алғашқы күнінде елі­­­міз­де Алғыс айту күні аталып өті­­леді. Аталған мерекеге орай аудан­­дық мәдениет үйі «Фейсбук» әлеуметтік желісіндегі ресми парақшасы арқылы «Достығымыз жарасқан» тақырыбында онлайн кон­церт ұсынды. 52 минут­ты құ­райтын бейнежазбаны 500-ден астам әлеуметтік желі қолда­­нушы тамашалап, оның 181-і өз пікір­лерін жазып қалдырыпты. Сондай-ақ 37 азамат бейнежазбаны өз парақ­шаларына бөліссе, 287 желі қолданушысы ұнату белгішесін басқан. Бұл онлайн форматтағы концерттің аудан тұрғындарына ғана емес, облыс аумағында ке­ңінен таралғанын білдіреді. Ал «7 мамыр – Отан қорғаушы күніне» арналып ұйымдастырылатын іс-шаралар жоспарын мәдениет саласының қызметкерлері бір­не­ше күн бұрын жариялады. Осыған орай әлеуметтік желі қолда­ну­шылары іс-шаралардың қай уақытта өтетінінен хабардар болды. Бұл аудандық мәдениет және тілдерді дамыту бөлімінің жұмысы ашықтық пен жариялылыққа негізделгенін аңғартады. Сәйкесінше, негізгі іс-шара, яғни «Ер – елінің қорғаны» атты мерекелік концерт көпшілік назарына 7 мамыр күні ұсынылды. Концерттік бағдарламада аудан әкімі Руслан Рүстемов бейнежазба арқылы көпшілікті мерейлі мерекемен құттықтаса, аудан өнер­паздары патриоттық әндер шыр­қады, көріністер қойылды. Бұл жолғы концертті әлеуметтік желі арқылы 600-ге жуық азаматтамашаласа, 250-ден астам әлеуметтік желі қолданушы пікір білдірді. Яғни көпшілік қауым мәдени-көпшілік іс-шараларды әлеуметтік желі арқылы тамашалауға дағдыланды. Ұлы Жеңіс күніне арналған «Желбірейді Жеңіс туы» атты концерттің де қаралымы көп болды. Ұлттық домбыра күні, Елорда күні мерекелері де онлайн форматта ұйымдастырылды, – дейді аудандық мәдениет және тілдерді дамыту бөлімінің басшысы Жеңіс Төрәлиев.

Онлайн форматтағы іс-шаралар кәсіби мерекелерге байланысты да ұйымдастырылуда. Мәдениет саласының қызметкерлері дәрігер­лердің, құқық қорғаушылардың, журналистердің мерекесін атап өтуді назардан тыс қалдырған жоқ. Әр мерекеге орай тақырыптық концерттер ұйымдастырылып, ол бейнежазба ретінде әлеуметтік желіге жариялануда. Сондай-ақ елдегі төтенше жағдайға байланысты карантин талаптарын сақтаудың маңыздылығы кеңінен насихатталуда. Бұл ретте аудандағы зиялы қауым өкілдерінің, ардагерлердің, сала мамандарының және ерікті жастардың пікірлері жарияланып, әлеуметтік желілер арқылы таратылуда. Бұл үйде отырған, қолынан ұялы телефон түспейтін әрі күнделікті бір-екі сағатың әлеуметтік желіге арнайтын азаматтар үшін пайдалы. Атап өту керек, аудандық мәдениет және тілдерді дамыту бөлімі мен аудан­дық мәдениет үйінің жүйелі жұ­мысы ауылдық округтерде де өз жалғасын табуда. Ауылдық мә­дениет үйлері мен клубтар мүшәй­раларды, байқауларды онлайн форматта ұйымдастырып, жария­­лап келеді. Сондықтан карантин кезінде мәдениет саласының мамандарының қолы бос, жұмысы азайды деп айту негізсіз. Олар елге рухани күш пен ерік-жігер беріп, елдің назарын игі істер мен жақсылықтарға аудару үшін аянбай еңбек етіп келеді.

«Қызметіміз – халыққа, өнеріміз – көрерменге» деген ұранды ту етіп, өз жұмыстарын адал атқарып жүрген мәдениет саласының майталмандарына алғыс айтамыз. Аудан тұрғындары мен әлеуметтік же­­лі қолданушыларын карантин кезінде концерттік бағдарламаларды онлайн тамашалау үшін аудандық мәдениет және тілдерді дамыту бөлімі мен аудандық мәдениет үйінің «Фейсбук» әлеуметтік желі­сіндегі ресми парақшаларына тір­келуге шақырамыз.

Балтабай ОРДАБЕКОВ 

08 шілде 2020 ж. 350 0