Шежірелі кітап жарыққа шықты

Tirshilik-tynysy.kz. – Адам баласы өткенін зерттеп білуге, тарихты түгендеуге, өткен мен болашақ арасында рухани сабақтастық орнатуға тиісті. Өйткені тағылымды тарихты, ата текті білмесе, келешегі кемел болмайтыны анық. Елбасының бастаамсымен жүзеге асып жатқан «Рухани жаңғыру» бағдарламасының да түпкі мәні осы.

Қазақ халқында халық мұрасы саналатын шежіре бар. Онда елдің өткен өмірі, тыныс-тіршілігі, қауымның даму белестері қамтылады. Осы ретте «Кіші жүз он екі ата Байұлы. Жаппас руының шежіресі» атты шежірелі кітабы жарыққа шықты. Шежірені Рахат Ғазитолла жинақтаған.

– Кітапта тарихи деректерден нақты мысалдар келтіріліп, тұтас бір жүздің сырлы шежіресі жинақталған. Қазақстанның әр аумағынан, одан тыс Өзбекстан, Қарақалпақстан, Түркіменстан, Ресей Федерациясы өңірлеріндегі шежіре-деректер бір кітапқа топтастырылып беріліп отыр. Сонымен қатар белгілі тұлғалар, елге танымал батырлар, билер мен шешендер, т.б. зиялы қауым жөнінде кеңінен баяндалған, – дейді редакциялық алқа мүшесі Ермек Аяпов.

Атап өту керек, 625 беттік кітап 1000 дана таралыммен жарыққа шыққан және көпшілік қауымға арналған.