Ұлттық санаққа дайындық қалай?

Биылғы жылы 1-30 қазан аралығында елімізде үшінші рет халық санағы өтеді. Бірінші рет санақ 1999 жылы өтсе, екінші рет 2009 жылы жүргізілген. Әрбір он жыл сайын өтетін санақтың биылғы ерекшелігі – санақ кезінде географиялық, демогрфиялық, экономикалық, білім, этномәдениет, көші-қон, денсаулық, кәсіп, жұмыс, табыс көзі сияқты мәліметтер ескерілетін болады. Науқандық жұмысқа еліміз бойынша 30 мың адам уақытша жұмысқа тартылады деп күтілуде. Олар нұсқаушы-бақылаушы мен сұхбат алушылардың қызметін ат­қарады.

Жалпы ұлттық санаққа дайындық қа­лай жүргізілуде және аудан бойынша атқа­рылған жұмыстар туралы аудандық статис­тика басқармасының басшысы Сейілхан Төлегенов айтып берді.

– Сырдария ауданының 2020 жылы Ұлт­тық халық санағына дайындық және өткізу бойынша аудан әкімінің 11 қазан 2019 жылғы №386 «2020 жылы Қазақстан Респуб­лика­сы халқының ұлттық санағын өткізуге жәрдемдесу жөнінде аудандық комиссия құру туралы» және 26 қараша 2019 жылғы №446 «2020 жылы Қазақстан Республикасы халқының ұлттық санағын өткізу жөніндегі Сырдария аудандық іс-шаралар жоспарын бекіту туралы» өкімдері шықты, – деді басқарма басшысы С.Қалманұлы.

Осы күні аудан бойынша кенттегі және елді мекендердегі көшелердің атауларын, кварталдардың, үйлердің және пәтерлердің нөмірлерін ретке келтіру, тұрғын жайларды аншлагпен қамтамасыз ету жұмыстары жүргізілген.

Кенттегі жаңа 7 көшеге және атауы жоқ 8 көшеге атау берілсе, О.Мәлібаев мөлтек ауданындағы 2 көшеге жаңадан көше атауы берілді. Дайындық жұмыстардың барысында кент 4 дана, барлық ауылдық округ 3 данадан схемалық картографиямен қамтамасыз етілген. Сонымен қатар өңірдегі кейіннен салын­ған үйлерге нөмір беру жұмыстары жүр­гізілу жалғасуда.

Халық санағына жауапты басқарма бас­шы­сының айтуынша, ауданға қарасты сая­­жайларды түгендеу А.Тоқмағамбетов ауыл­дық округінің әкіміндігіне тапсырыл­ған. Ауыл әкімдігі тарапынан саяжай тұрғындарының есебі, ЖСН-і құжатқа түсіріліп, шекаралары нақтыланған саяжай­лардың схемалық карталары жасалуда.

Басқарма берген мәліметке сәйкес, санақ жүргізетін кенттегі және ауылдық округтегі санақ бөлімінің меңгерушілері мен нұсқаушы-бақылаушы отыратын жайлар да нақтыланған. Барлық учаскілер телефон байланысымен, компьютермен, яғни интернетпен қамтамасыз етілген. Олар мемлекеттік органдардың бірыңғай транспорттық орта­лы­ғына қосылған.

Ұлттық халық санағына дайындықтың негізгі жұмыстарының бірі – бұқаралық ақ­парат құралдары арқылы халыққа жаппай түсіндіру жұмыстарын жүргізу екені белгілі. Осы ретте көшелерді билбордпен, кермемен, баннермен безендіру үшін жергілікті бюджеттен қаражат қаралған. Бөлінген қаржыға әрбір ауылдық округке 1 билборд пен 1 керме, кент орталығына 4 билборд пен 2 керме дайындалатын болады.

С.Төлегеновтің мәліметінше, жауапты науқанда санақтың дұрыс әрі сапалы жүргізілуі ауылшаруашылық кітабына байланысты. Сондықтан ауылдық округ әкімдеріне электронды шаруашылық кітабына жаңадан салынған үйлерді түгендеу, олардың нө­мірлерінің дұрыстығын тағы бір мәрте тексеру тапсырылған. Әрбір мекен жай бо­йынша халық санын түгендеу, яғни жаңадан түскен келін, дүниеге келген сәбилерді тіркеу, дү­ниеден өткен кісілерді есептен шығару және басқа жақтан көшіп келген немесе көшіп кеткен тұрғындарды түгендеу түсіндіру жұмыс­тары жалғасуда.

Ұлттық санаққа дайындық жұмыстары ау­данда қарқынды жүргізілуде. Санақ қоры­тындысы жыл соңында белгілі болады.

Бибісара ЖАНӘЛІ