Тұғырлы тұлғаға лайықты құрмет

Мемлекет басшысы Қасым-Жомарт Кемелұлы Тоқаевтың Жарлығымен әлемге танылған көрнекті жазушы Әбдіжәміл Кәрімұлы Нұрпейісовке «Қазақстанның Еңбек Ері» атағы беріл­генде көзі ашық, көкірегі ояу оқырман қауым бір-бірінен сүйінші сұрасты. Өйткені ғасырға жуық ғибратты ғұмыр кешіп келе жатқан өнегелі өмір иесі бұл атаққа әбден лайықты еді. Қажырлы еңбекке көрсетілген лайықты құрмет жөніндегі қуанышты хабарды сырдариялықтар да зор ықыласпен қабыл алды.

Әбдіжәміл Нұрпейісовтің есімі әдеби ортаға етене таныс. Қаламына құт қонып, бақ дарыған еңбегі ерен қайраткер-тұлғамен ел тәуелсіздігінің қуанышына бірге бөленіп, бір за­манның ауа­сымен тыныстап жүргеніміздің өзі бір ғанибет. Тіпті, заманның заңғар тұлғасы әдебиеттегі біздің бағдаршымыз, арқасүйер алып бәйтерегіміз. Пайымдап қарар болсақ, Мұхтар Әуезовтен кейін қазақ әдебиетін әлемге танытқан бірден-бір тұлға – Әбдіжәміл Нұрпейісов.

Қаламгердің қуатты қаламына арқау болған «Қан мен тер» романында ХХ ғасырдың ауыртпашылыққа толы алғашқы жиырма жылы, революциялық дәуірдің адам сенгісіз дүмпуі, сілкіне де бұлқына бастаған Арал өңірінің түйіні тарқамаған мәселелері, революция рухымен ояна бастаған қазақ халқының бастан өткерген қилы сәттері ғажап суреттелген. Бұл талантты қаламгердің дара дарын иесі екенін білдіреді.

Ұлы жазушының ұлылығын өзінің көз ал­дында аспандатып, мерейлі то­йын бүкіл елдің тойы ретінде абы­рой­мен атап өтіп жатқанымыз – өркениет ауылына нық бет бұрғанымыздың көрінісі. Түптеп келгенде, Әбдіжәміл Нұрпейісовтің есімі «Қазақстанның Еңбек Ері» атағының абыройын асқақтатып тұр.

«Тт-ақпарат»