Ел үшін жанын пида еткен ерлер өлмек емес.

***

Батыл адам тастан да нан табады.

***

Беделін – сәулетің, еңбегің – дәулетің.

***

Бойы – бәйтеректей, ойы – бұтақтай.

***

Теңізден терең халық ішінде  небір алмастай асыл ойлар жатыр.  Жақсы ой тек ілгері жетелейді.  Сондықтан да адам ойы асқар тау­дан сарқырап аққан су секілді  сарқылуға тиісті емес. Ол тек үдей түсуі, таси беруі керек.

***

Бұл өмірге «қонақпын» деп қараған адам – қарағайға бір түн қо­нақтап кеткен қарғамен тең.

 ***

 Адам – тастан берік, гүлден нәзік. Нендей ауыртпалықты болмасын, адам баласы атан түйе секілді көтеріп әкетеді. Малым – жанымның садағасы, жаным – арымның садағасы дейді де, неге де болмасын белсене кірісіп, қайғысын – тіршілік талабына жеңгізіп, бұрынғыдан бетер пыси түседі.

***

«Тұқымын алып жерге бер» деген. Әрбір дақыл тұқымнан өнеді. Өністі тұқым – ырыстың жоралғысы.

***

Дән бала сияқты, ол да мәпелеуді сүйеді, ол да аялағанды тілейді.

***

Бітік күріш біркелкі тегіс жерде ғана өсіп-өнеді. Өйткені, күріш – суда өсетін дақыл. Ал су тегіс жерге ғана жайылады.

***

Адам сияқты егін де таза суды сүйеді. Ескірген, лас судан өсімдік те ауырады. Тамаша дақылға таза су бер.

***

Жас күріштің сабағы түбіттей нәзік келеді. Оны тек тамырымен ғана суырып аласың. Жер ылғалды болса, тамыр тереңге кетеді, күрішке береке бітеді.