Намыс қайралып, байрақты бәсеке қыза түскен шақта жүлдегер қатарына төрт құрлықтың спортшылары ене бас­тады. Бұл ретте бірнеше күн бойы Ұлт­тық құраманың қоржыны бос болып, жан­күйерлер қуанатын сәтті ұзақ күтті. Ақыры ел халқының сенімі ақталып, 14 ақпан күні бір сәтте тарих жазылды. Қазақстандық атлет Михаил Шайдоров мәнер­леп сырғанаудан Олимпиада чемпионы атанып, ел мерейін үстем етті. Қысқа бағдарлама қорытындысы бойынша бесінші орында тұрған отандасымыз еркін бағдарламада қарсыластарына дес бер­меді.

Мемлекет басшысы Қасым-Жомарт Тоқаев Михаил Шайдоровты Қысқы Олим­пиада ойындарының чемпионы атануы­мен құттықтады. Ел Президенті отан­дық спорт тарихында мәнерлеп сыр­ғанаудан тұңғыш рет алтын медаль иеленуді тарихи маңызы зор жетістік ретін­де атап өтіп, Михаил Шайдоровты II дәрежелі «Барыс» орденімен марапаттау туралы шешім қабылдады.

Айта кетейік, соңғы 32 жылда Қазақстан құрамасы ақ Олимпиададан алтын медаль еншілеген емес. Осыдан 12 жыл бұрын дәл осы күні еліміздің даңқ­ты спортшысы Денис Тен қола медаль иеленген болатын. Расында, Михаил Шайдоровтың орасан зор жетістігі – ел спортының тарихына алтын әріппен жазы­латын тарихи сәт. Отандасымыз қос бағдарлама қорытындысы бойынша 291.58 ұпай жинады. Италияда атлетке ҚР Туризм және спорт министрі Ербол Мырзабосынов, Қазақстан Ұлттық Олимпиада комитетінің президенті Геннадий Головкин бастаған жанкүйерлер қолдау көрсетті.

Бүгінде Олимпиада ойындары қыза түсуде. Қар жаумайтын, бұрын қысқы спорт түрлеріне қызығушылық таныт­пайтын елдердің спортшылары да жүлдеге таласуға мүмкіндігі бар екенін көрсетуде. Ал Ұлттық құрама спортшылары артылған сенім үдесінен толық шыға алмай отыр. Еліміздің БАҚ өкілдері Ақ Олимпиада ­ойындарынан жедел ақпа­рат таратуда.

Осы аптаның жексенбісінде аяқта­ла­тын дүбірлі додада әлемнің 90-нан аса елінен келген 2900-ге жуық спортшы 8 спорт түрінен 116 медаль жиынтығын сарапқа салады.