Сырдариялық спортшылар жеңіс тұғырында

Жақында гір көтеру спортынан облыс құрамасы Қырғызстан мемлекетіне ат басын тіреген болатын. Бішкек қаласында жалауын көтерген гір көтеруден Азия чемпионатында жерлестеріміз жеңіс тұғырынан көрінді. Орасан зор жетістікке қол жеткізген Сыр спортшылары қа­тарында Жеңісбек Төлеген мен Оразбек Медетбаев бар.

Негізінен, Азия чемпионатына сары құрлықтың 15 елінен 550 спортшы келген. Кіл мықтылар күш сынасқан жарыс­та Жеңісбек Төлеген +85 келі салмақта серпе және жұлқа көтеру бойынша алтыннан алқа тақты. Қос алтынды қанжығасына байлаған спортшының негізгі мамандығы медицина саласы екенін айта кетейік. Өз кезегінде ау­дандық емхананың дәрігерлері біз­ге хабарласып, әріптесінің мерейлі же­ңісімен құттықтады.

– Медицина мен спортты қатар алып жүрген әріптесімізді кезекті тола­ғай табысымен шын жүректен құттық­таймыз! Өз ісінің білгірі бола білген әріптесіміз гір спортымен тұрақ­ты түр­де шұғылданады. Азия чемпионатында аудан мерейін асырып, жеке дара көш бастағанына бек қуаныштымыз. Алғаш ақжолтай жаңалықты естіген кезімізде кеудемізді мақтаныш керне­ді. Қай кезде де өзінің табандылығы мен жігерінің арқасында аудан намысын қорғап жүрген Жеңісбек Өмір­бекұлына алдағы уақытта сәт­ті­лік тілейміз, – деді аудандық емхана­ның мамандандырылған бөлім меңгеру­шісінің уақытша міндетін ат­қарушы Гүлнұр Әбдіхалыққызы.

Иә, Жәкеңнің жеңісті жолын гір спортынан әлем чемпионы, жерлесіміз Оразбек Медетбаев жалғастырды. Об­лыстың аға жат­тықтырушысы және Сырдария аудандық спорт клубының жаттықтырушысы О.Медетбаев Азия чемпионатында 73 келі сал­мақта ІІ орынды жеңіп алды.

Айта кетейік, Азия чемпионатында өңірден барған 9 алтын, 1 күміс және 3 қо­ла медаль жеңіп алып, аймақ мерейін үстем етті. Алтын және күміспен күптелген жер­лестеріміз байрақты бәсекелерде аудан мерейін асқақтата берсін демек­піз.

Балтабай ОРДАБЕКОВ